Evâsıt-ı mâh-ı zilhiccede Müneccim-başı Halîl Efendi'nin mâh-ı serîʿu's-seyr-i ʿömrü giriftâr-ı mehâk-ı zevâl ve Müneccim-i sânî ʿAbdullah Efendi riyâset-i mezkûre ile nâyil-i rasadgâh-ı ikbâl olup, Âsitâne-i saʿâdet'de zabt-ı vekāyiʿ ile meşgûl ve fenn-i necâmetde Ebû Maʿşer Belhî derecesine mevsûl olan Musâ-zâde Efendi, Müneccim-i Sânî ʿunvânını kesb ile nazar-ı ʿâtıfete meşmûl oldu. Rebîʿulâhır gurresinden Halebü'ş-şehbâ ve Kuds-i Şerîf ve gurre-i muharremden bâ-Pâye-i Kudüs, Galata leff ü neşr-i müretteb üzere etıbbâ-i Hâssa'dan [M2 249] Surre Emîni-zâde es-Seyyid Mehmed Saʿîd Efendi'ye ve İlâhî-zâde es-Seyyid Süleymân Efendi'ye ve es-Seyyid Mehmed Tâhir Efendi'ye tevcîh olundu.