Zilkaʿdenin sekizinci günü Ordu-yi hümâyûn'da mevcûd olan ricâl ve hademenin mansıbları ibkā olunup, fekat Nûh Bey Âsitâne'ye ʿazîmet etmek bâbında dâmengîr-i ilticâ olmağla, mutasarrıf olduğu Sipâh Ağalığı, Aydoslu Hasan Ağa'ya tevcîh ve Büyük Rûznâme Pâyesi'yle Re’îsülküttâb Efendi Vekîli Büyük Tezkireci olan İbrâhîm Münîb Efendi'nin kadr u menzileti terfîʿ u tenvîh olundu. Murahhas Efendi'nin ve maʿiyyetinde olan efendilerin dahi mutasarrıf oldukları menâsıbın ru'ûslarıyla hılʿatleri, Sadrıaʿzam Mühürdârı'yla Bükreş'e irsâl olunup, herkes iktisây-ı hılʿat ve ahz-ı ru'ûs ile hâyiz-i rehîne-i hubûr ve muharrir-i Fakīr bu cümle dâhilinde olup, mutasarrıf olduğum Gurebâ-i yesâr Kitâbet'i ibkāsıyla mesrûr oldum. Mühürdâr'a hîn-i ʿavdetinde Murahhas Efendi tarafından semmûr kürk ve üç bin guruş hidmet [M2 241] verilüp, maʿiyyetinde olan efendiler daʿvet ve ru'ûs mesârifinden vâreste ve bu takrîb efendi-yi mûmâ ileyhin senâsı târum-i çarh-ı esîre peyveste oldu.