Efendi-yi mûmâ ileyh sâl-hûrde vü pîr ve birkaç seneden berü germ ü serd-i [M2 240] rûzgârı muʿâyene ile kuvây-ı vücûdu bi'l-külliyye halel-pezîr olup, ʿâkıbet ʿaraz-ı maraz ile dil-hırâş ve bir müddet pehlû-zede-i kenâre-i firâş olup, Şevvâlin on ikinci günü niʿmet-i hayâtdan dilsîr ve vâsıl-ı rahmet-i Hayy-i Kadîr oldu. Mûmâ ileyh yüz on iki sâlinde meşîme-i çâk-ı şühûd ve fârık-ı miyân-ı bûd u ne-bûd oldukda pederi vefât ve mevâlîden ceddi ʿOsmân Efendi'nin âgûş-i terbiyyesinde tahsîl-i kemâlât edüp, neyl-i mülâzemetle kâm-bîn ve kırk üç târîhinde min ihde'l-müderrisîn olmuşidi. Tabʿında zerâfet ve cildinde ʿadem-i sıklet hasebiyle, ekser kibâra enîs ve bâ-husûs baʿzı vüzerâya hem-râz u celîs olup, Dâmâd-zâde Meşîhati'nde ʿazl ve Defter-i müderrisînden ismi hakk ile mübtelây-ı zell ü ezell olup, bir müddetden sonra kemâ-kân tarîka duhûl ile baʿzı hidmetlerde istihdâm ve bâ-husûs Maktûl Beşîr Ağa zemânında Haremeyn Müfettişliği ile tertîb-sâz-ı esbâb-ı ʿizz u ihtişâm ve altmış sekizde Galata Mevleviyyeti ile mazhar-ı sunûf-i ikrâm olmuşidi. Baʿdehû Mısr-ı Kāhire ve Mekke-i mükerreme kazâlarıyla dilşâd ve ʿAbdullah Efendi yerine İstanbul Pâyesi'yle Ordu Kadısı nasb olunup, târîh-i mezkûrda ʿâzim-i semt-i meʿâd oldu. Efendi-yi mûmâ ileyh nisâc-ı kârgâh-ı meʿânî ve vâkıf-ı mezâyâ-yı meʿârif ü nüktedânî-yi hüsn-i selîka ile mezkûr ve Sultân Mahmûd merhûmun binâ eyledikleri bende, [mısrâ]: "And[a] bend etdi bu bend-i âb-ı hayâtı sû-be-sû" târîhi beyne'n-nâs mütevâtir u meşhûrdur.