Karamân Vâlîsi'nin Şâm me'mûriyyeti munsarıf varakada dahi ictimâʿ-ı nâs ile mizâc-ı râhat ü sâmânı münharif olup, Karamân Eyâleti tarafına tevcîh ü ihsân ve Sürücülük ile refîʿu'ş-şân kılınmışidi. Bu behâne ile çep ü râstında vâkiʿ kurâ ve kasabâtı cuğd u bûma âşiyâne ve ehâlîsinin bünyâd-ı taʿîşlerini harâb ü virâne edüp, ne hâl ise Ordu-yi hümâyûn'a resîde ve beş altı yüz kadar ʿUrbân ve atları lağar ve nâ-tüvân asker ile saff-keşîde olup, emsâline erzânî kılındığı vech üzere ferve-i semmûr iktisâ ve Ordu-yi hümâyûn'un bir cânibinde haymelerini nasb ile visâde-i râhata istilkā eyledi. Tekâsüf-i ebr-i midrâr ile nâzil olan emtâr, insân ve hayvânı mübtelây-ı çâr-mevce-i iztırâb u nâ-tüvânî ve bürûdet-i cevv-i hevâ cümleyi giriftâr-ı ʿazâb-ı rûhânî vü cismânî edüp, bu sebeble ittihâz-ı meştâ ve bir şehr-i zâhirû'r-rehâda behâra dek defʿ-i sevret-i şitâ zamîr-i Sadr-ı âlî-kadrda cilve nümâ olup, Ordu-yi hümâyûn'da mevcûd vüzerâ vü vükelâ otâk-ı Süreyyâ-nitâka cemʿ ve bu keyfiyyete cümlesi havâle-i semʿ edüp, baʿzıları: “Sadrıaʿzam Ordu-yi hümâyûn ile Âsitâne-i saʿâdet'e ʿazîmet ve Murahhas Efendi tarafından pey-der-pey vürûd eden mevâddın hüsn-i temşiyetini ʿarz-ı pâye-i serîr-i Saltanat edüp, mahzâ buğz u hasedden nâşî safsata vü mağlatayı câmiʿ kelâm-ı gayr-i vâkiʿ ile bu maslahat-ı hayriyyeyi mâniʿ olanları redʿ ve fâyide-i ceng ü sulhu muvâzene ile muhayyel olan fesâdâtı defʿ ve her vechile münâsibdir” dediler. Baʿzıları dahi: “İhtimâl-i iʿâde-i harb ile Serdâr-ı ekrem'in buʿdu, maslahat-ı harbiyyeye bir vechile muvâfık olmayup, Edirne hısb u rehâ ile şöhret-nümâ ve Âsitâne-i saʿâdet'e nisbetle serhadlere karîb bir şehr-i vesîʿu'l-ercâ olmağla, ittihâz-ı meştâya evleviyyeti zâhir u hüveydâdır" dediler. Baʿzı ashâb-ı ʿukūl: “Edirne ve İstanbul'da kışlamak lâzım gelürse, birkaç seneden berü metâʿib-i seferiyye ile muztarib ve âteş-i firkat-i evlâd ü ʿıyâl ile mültehib olanlar refâhiyyet-i ʿîş ve nuʿûmet-i lihâf ile i’tilâf edüp, iʿâde-i harb [M2 239] lâzım geldikde, yerlerinden tahrîkleri müteʿassir ve tîz elden yine Şumnu'ya varılmak hayli müteʿazzir olup, şöyle ki her ne kadar hareketde sürʿat gösterilse dahi, asker mukābele-i aʿdâya varıncaya dek serhadlerin ekserîsi giriftâr-ı yed-i düşmen olacağı müteyakkan ve bu takdîrde kemâ-kân Şumnu'da ikāmet müstahsen olduğundan başka, Murahhas-ı devlete dahi sebeb-i kuvvet ve baʿzı mevâddın istimzâcına kasr-ı mesâfe sebebi ile medâr-ı sühûletdir" dediler. Erbâb-ı meşveret icrây-ı re’y-i ahîrde safka-zen-i ittihâd ü muvâfakat olup, gurre-i Ramazânda Serdâr-ı ekrem hazretleri ve sâyir ricâl ve ocağlu Şumnu'ya duhûl ve sâbıkı üzere herkes hânesine nüzûl edüp, hâric-i kasabada hayme-nişîn olan Vezîr Seyyid Nuʿmân Paşa Pravadi (Provadia) Kasabası'nda ve Vezîr İbrâhîm Paşa Hezargrad Kasabası'nda kışlamak husûsu dahi meclisde karar-dâde olup, bu irâde şifâhen müşârun ileyhimâya ifade olundu. Bundan akdem himmet-i Âsafâne ile ocağlardan tahsîl olunan küllî mahlûlât kısteyn mevâcibini taklîl ve edâsını teshîl edüp, bu hidmet nezd-i ferd-i Şâhâne'de bâʿis-i tahsîn ü pesend ve Serdâr-ı ekrem hazretlerinin kadr u iʿtibârını bâlâ-ter ü bülend edüp, Çakırcı Paşa Ağa vesâtatıyla semmûr kürk ve mücevher hançere mashûb hatt-ı hümâyûn, mevkiʿ-i vusûle makrûn ve birkaç günden sonra Ağa-yı mûmâ ileyh mültefit ü memnûn Âsitâne tarafına revâne oldu.