Şaʿbânın on üçüncü günü iki devlet murahhasları mütesâviyyü'l-ikdâm mahall-i mükâlemeye duhûl ile rüsûm-ı ʿâdiyeyi itmâmdan sonra meclis tahliye ve Hayrî Efendi ve bu Fakīr ve öte tarafdan dahi iki nefer sır kâtipleri ve tarafeyn tercemânları meclisde kalup, Hayrî Efendi o tarafın ve Fakīr berü tarafın mübâhasesini zabta şurûʿ eyledik. İbtidâ iki taraf resm-i kadîm üzere sânihalarını kırâ'et ve sâniyen mütâreke sohbetine şurûʿ u mübâşeret ve Obreşkof: “Mütârekenin müddeti ne mikdâr olsun" deyü su'âl eyledikde, Re'îs Efendi: “Ekalli altı mâh olsun" dedikde, Obreşkof istiksâr ve: “Şu efendi ile mukāvelemiz kırk günü altı mâha takrîb idi, sözümüzden nükûl etmeyüz, aralıkda zâyiʿ olan eyyâmın üzerine üç mâh zam olunsa, ʿahd-i sâbıka mukārebet hâsıl olurdu" dedikde, Re’îs Efendi: “Mütârekenin ʿadem-i vüsʿati bizden evvel bu maslahata me'mûr olanları ne mertebe izʿâc eylediği zâhirdir, baʿzan katʿ u fasla karîb mâddeler istîzâna tevakkuf edüp, Peterburg'a âdem varup gelinceye dek bir defʿada o mikdâr müddet münkazî olup, tekrar mütârekeye ihtiyâc mess eyleyeceği be-dîdârdır, yoğise mütâreke eyyâmının kıllet ü kesreti ʿindimizde müsâvîdir” dedikde, ruhsatı dört mâha munhasır olup, ziyâdesi elinden gelmeyeceğini katʿan ifâde vü beyân ve tarafeynden vâfir ebhâs güzerân edüp, âhıru'l-emr Gürcistan ve sâyir emâkin-i bâʿîdenin bir mâh zamîmesi ile berü tarafdan kabûl ve bâdî-yi emrde tenâfüri mûcib evzâʿ izhârından ʿudûl olundu. Tarafeyn ʿAbdulkerîm Efendi'nin mütâreke şurûtunu iltizâm ve tasdîk ile lâzım gelen senedleri tahrîr ü temhîr ve baʿde'l-mübâdele bir sûreti Ordu-yi hümâyûn'a gönderildikde, nevrûza dek temdîd-i müddet kalb-i Sadâret-penâhî'ye ilkāy-ı [M2 238] hizzet ü beşâşet edüp, fi'l-hâl mütâreke ahbârını serhadlara neşr ü iʿlân ve tavâyif-i askerî husûl-i âsâyiş ve ferâğ ile ihtilâs ve vakt ü zemân ve âlât-ı harbiyyeyi âvihte-i mismâr-nisyân eylediler.