Efendi-yi mûmâ ileyhin iktızâ eden havâyici tetmîm ve maʿiyyetinde olan efendilerin dahi harc-ı râhları tevzîʿ u taksîm olunup, taraf-ı hümâyûndan verilen ruhsatnâme dahi yedine teslîm ve şehr-i recebin yirmi beşinci günü Sadrıaʿzam hazretleriyle resm-i perdâz-ı vedâʿ ve taraf-ı Âsafâneleri'nden keşîde kılınan esb-i mutallâ kecîme süvâr olarak, menzile-i kadri vâsıl-ı ser-menzil-i irtifâʿ olup, yevm-i hareketlerinin beşinci günü Ruscuğ'a pâ-nihâde-i vürûd ve karşuda levâzım tedârükü içün altı gün kadar Kasaba-i mezkûrede ârâmsâz-ı kuʿûd olmuşlar idi. Şabân-ı şerîfin yedinci günü müretteb alay ve mehterhâne ile şaykalara râkib ve karşu tarafa zâhib olduklarında, kasabaya nısf sâʿat mesâfede nasb olunan hıyâma nüzûl ʿakabinde Yergöğü Kumandanı gelüp, îfây-ı resm-i terhîb ve berü tarafdan dahi su'âl-i hâtır ile tatyîb kılınup, ferdâsı Bükreş'e ʿazîmet ve dört günde kasabaya duhûl ile defʿ ü asâ-yı meşakkat eylediler. Tercemânlar vesâtatıyla tarafeynden icrây-ı muʿâmele-i hoş âmedî kılındıkdan sonra, Obreşkof bi'n-nefs Re'îs Efendi'nin konağına gelüp, tebrîk-i makām ve îfây-ı lâzime-i taʿzîm ü ikrâm edüp, ferdâsı Efendi-yi mûmâ ileyh tarafından Rusya Murahhası Obreşkofa [M2 237] müzeyyen bir re's esb ve mahdûmları Ahmed Hamîd tarafından Obreşkof'un maʿiyyetinde olan Merşal'in oğluna bir donanmış at irsâl ve anlar dahi semmûr ve kakım mukābelesiyle zeyl-i teşekkürü isbâl eylediler. Bir gün sonra Devlet-i ʿaliyye Murahhası dahi Obreşkof'un hânesine ʿazîmet ve cüz'îce âfâkī musâhabetden sonra mükâlemeye şurûʿ müzâkeresi sebkat ve yârınki gün bed' ve mübâşeretde demsâz-ı muvâfakat olmalarıyla, iki tarafın sır kâtipleri ve tercemânları mahall-i mükâlemeyi ru'yet ile ʿavdet eylediler.