Sefer takrîbi ile ashâb-ı ‘ulûfe ve vezâyif, dâyire-i haddi mütecâviz ve mutezâʿif olduklarına nazaran, hîn-i hâcetde cem'-i kesîr ile edây-ı hidmet lâzime-i 'uhde-i diyânetleri iken, baʿzısı esâmesini muhâfaza ve bu mülâhaza ile vilâyetine ‘âzim ve baʿzıları devâyir-i kibâra melî-i batn ve ednâ maʿîşet ile mütereddid ü mülâzim olup, bu hâl ile kayıdlarına bakılsa, yirmide biri mevcûd olmadığı cezmen meşhûd ve ocağlarda küllî mahlûlât meʼkel-i erbâb-ı hıyânât olduğu, mekşûf-i zamîr-i Sadr-ı sütûde-sıfât olmağla, zikr olunan husûs Reʼîsülküttâb Efendi'ye havâle ile ağaları ihzâr ve sûret-i terhîb ü tergībde muʿâmele-i hakîmâne izhâr olunup, hemân o günkü gün sipâh ve silahdâr ocağlarından yedişer bin akça mahlûl verilüp, sâyir ocağlardan dahi bi't-tedrîc vâfir mahlûl tahrîc olunup, beytü'l-mâl-i müslimîne iʿânet ve küllî hidmet ile Efendi-yi mûmâ ileyh taraf-ı Sadâret-penâhî'den dest-i nüvâzende-i ʿizz u hürmet oldu.