İttifâk-ı ârâ ile istisvâb olunan mütârekenin tasdîknâmesi, Rusya Feldmerşal'i Romançof tarafından receb-i şerîfin dokuzuncu günü Ordu-yi hümâyûn'a vâsıl olup, Rusya Murahhası Obroşkof mahall-i mükâleme tahsîs olunan Bükreş Kasabası'na varmak ve Devlet-i ‘aliyye tarafından dahi sâhib-i rütbe bir zât taʻyîn olunmak husûslarını mektûb-i müstakil ile ifade etmişidi. Mâdde-i mezkûre muʿzamât-ı hutûb-i Devlet-i 'aliyye'den olduğuna binâ'en, fi'l-hâl bir meclis-i hâfil tertîb ve ekâbirân-ı devlet ihzâr u takrîb olunup, Serdâr-ı ekrem huzzâra hitâb ve: “Bu bâbda re'y-i savâb nedir?" deyü isticvâb eyledikde: “Emr-i mütâreke ber-vech-i sühûlet pezîrây-ı temşiyet olduğuna nazaran inşâallâhü Teʿâlâ musâlaha husûsu dahi ber-vefk-i meʼmûl karîn-i hayyiz-i husûl olacağı mahsûs olup, hemân bir sâʿat akdem taʻyîn-i Murahhas ile maslahata bakılmak maʿkūldur” dediklerinde, Sadrıaʿzam: “Devlet-i ‘aliyye murahhaslarının ‘avdeti vakte mevkūf ve 'an-asl mevâdd-ı musâlaha Re'îsülküttâb bulunanlar ile 'akd oluna geldiği maʿrûf olup, Reʼîsülküttâb bulunan ‘Abdurrezzâk Efendi'nin cevelân-ı tabʿ ve hiddet-i zihn ile ittisâfı ve Devlet-i ‘aliyye'nin her hâlde iʿtimâd-kerdesi olmağla, Murahhas taʻyîn olunması re'yimize göre mahz-ı savâb ‘add olunayor siz ne dersiz?” Huzzâr-ı meclis re'y-i Sadâret-penâhî'yi her tarafdan istihsân ve mûmâ ileyhin mehâsin ü dirâyetini yek-be-yek şümürde-i benân-ı beyân eylediler. Binâ'en ʿalâ zâlik şehr-i recebin on birinci günü ittifâk-ı ârâ ile mûmâ ileyh Büyükelçi ve Murahhas nasb olunup, dûş-i istihkākına ilbâs-ı ferve-i semmûr kılındığından başka, istişâre-i umûr zımnında Baş-muhasebeci Süleyman Penâh Efendi ve Silahdâr Kâtibi ‘Atâʼullâh Beyefendi maʻiyyetine meʼmûr kılınup, Beylikçi es-Seyyid Mehmed Hayrî Efendi Sır Kâtibi ve bu Fakīr, Mükâleme Kâtibi ve Mektûbcu Kalemi'nden iki nefer mübeyyiz dahi terfîk ve ‘ıkdü'l-leʿâl-i Vekâlet-i Riyâset, Tezkire-i Evvel İbrâhîm Münîb Efendi'nin gerden-i [M2 236] liyâkatine taʿlîk olundu.