Kandiye Muhâfızı Vezîr Hüsnü Hüseyin Paşa birkaç gün muttekî-yi bâlîn-i bîmârî ve evâyil-i cumâdelûlâda vâsıl-ı rahmet-i hazret-i Kird-gârî olup, münhal olan Kandiye mansıbı, Yeniçeri Ağalığı'ndan muhrec Kāyim-makām-ı esbak Vezîr Süleyman Paşa'ya sezâvâr ve elyak görüldü. Eğriboz Sancağı tevcîh olunan Vezîr Sunʿullah Paşa dahi mansıbına ʿâzîmet eder iken, rehzen-i ecel sebîl-i hayâtını sed ve cevher-i rûhunu merciʿ-i aslîsine red edüp, mansıbı ile Derbendler Başbuğu Vezîr ʿAli Paşa nâyil-i surûr-i bî-had oldu. Müşârun ileyh Silahdâr-ı hazret-i Şehriyârî iken, seksen beş târîhinde Anadolu Eyâleti ile Çerâğ ve hâyiz-i dest-mâye-i refâg olup, bir müddet Muʿârız Boğazı'nı hıfz u hırâset ve ber-minvâl-i muharrer Eğriboz'a gider iken ʿâlem-i ʿukbâya rıhlet eyledi.