Yergöğü'de ʿAbdulkerîm Efendi ile vâkiʿ olan mükâlemede imtidâd-ı mütâreke, murahhasların re'yine ihâle ile tayy-ı makāle olunmuşidi. Murahhaslar bir mahalle ge- lüp, mütârekeyi ʿâşir-i eylüle dek medd ve tarafeynden tarh-ı külfet ve ahadühümâ âharın kadrine [M2 223] riʿâyet ve iktizâ eyler ise murahhaslar râkiben ve râcilen münferiden ve cemʿan mülâkāt edüp, sır kâtibleri ve tercemânlarından mâʿadâ istirâk-ı esrâr ve celb-i havâdis ü ahbâr içün mahall-i mükâlemeye şahs-ı vâhid takrîb olunmayup, murahhaslardan gayrîleri baʿde'l-magrib mahallerinden hareket etmemelerine tenbîh olunmak ve musâlaha mukadder olmadığı hâlde, hudûda dek iktizâ eden levâzım ile esbâb-ı emniyyet ü râhat iltizâm ve eyyâm-ı mükâlemede baʿzı bed-hâhlar siʿâyet ve ilkāy-ı nifâk ile maslahatı ifsâd içün ihtırâʿ-1 urcûfe eyledikleri lede't-tahkīk iki tarafdan ketm olunmayup, yek-diğeri âgâh ve refʿ-i iştibâh etmek husûsları mükâlemeden evvel mukāvele ve cumâdelûlânın yedinci günü bu resme riʿâyet olunarak, tarafeyn murahhasları mahall-i mükâlemede ictimâʿ ve sânihalarını birbirine ismâʿ eyledikden sonra mutevassıtların meclis-i mükâlemeye duhûl ve ʿadem-i duhûlleri nizâʿı mümtedd olup, ne hâl ise şurût-ı sâlifeyi mutazammın mütâreke senedleri iki tarafdan tahrîr ü imzâ ve temhîr ve baʿde'l-mübâdele Devlet-i ʿaliyye'ye irsâli muktezî olan senedât vâsıl olduğu gibi taʿyîn-i müddet ile eyyâm-ı mütâreke serhadlere ve sâyir iktizâ eden mahallere iʿlân ve ol bâbda neşr ü fermân ve defʿ-i ʿudvân kılındı.