Murahhaslar [M2 222] Âsitâne-i saʿâdet'den gelür iken, Prusya elçisi Devlet-i ʿaliyye askeri birkaç senedir tahsîne elyak bir maslahat-ı nâfiʿaya muvaffak olmayup, hâl-i bedâvetden menzile-i hadariyyete intikāl ve düşmen dahi ru'esânın ʿadem-i mübâlâtıyla askerinin terk-i âzmâyiş-i cidâl ve ihtiyâr-ı fütûr u ihmâl eylemesini müşâhade ve tecribe ile pâ-bercây-ı nahvet ü istikbâr ve Devlet-i ʿaliyye askerini gözlerine gösterüp, mübâhasede celâdet ve evzâʿ-1 zor-mendî izhâr eyleyeceklerini işʿâr ve böyle bir devlet-i kaviyyü'ş-şekîmeye Moskovlu'nun nazar-ı hakāret ile bakması lâyık u sezâ-vâr olmayup, Serdâr-ı ekrem hazretleri aralık aralık tebdîl-i yurd u mekân ve harbe istiʿdâd sûretini iʿlân eylese, teshîl-i maslahata ʿillet olacağını beyân etmişidi. ʿOsmân Efendi Prusya elçisinin takrîrini Sadr-ı sütûde-tedbîre ifâde ve bu mâdde kasd u irâde-i Serdâr-ı ekremî'ye tevâfuk etdiyse dahi, kıllet-i zehâyir mâniʿ-i hatt u tirhâl-i asker olup, Ordu-yi hümâyûn'un ikişer üçer sâʿat ilerüsünde birer ordu tertîb ve düşmene mukābele muʿâmelesini izhâr ile mükâlemeyi âzâde-i ʿârıza-i tasʿîb suver-i mergūbesi tasvîb olunup, fi'l-hakīka bu tedbîr-i sâyib min külli'l-vücûh münâsib ve Harb iʿâde eder ise asâkir-i İslâm cenge müte'ehhib bulunmuş olacağlarını münʿakid olan meclis-i şûrâda medâr-ı kabz u bast olanlar bilâ-ihtilâf ikrâr u iʿtirâf ve bu re'y-i savâbın fiʿle çıkmak bahsini dem-be-dem tecdîd ü istînâf eylediler. Binâ'en ʿalâ zâlik Tırhala ve Selânik mutasarrıfları Vezîr ʿOsmân Paşa'ya ve İbrâhîm Paşa'ya birer ordu tanzîm ve asâkir ü mühimmatları tetmîm olunarak, râbıta-i ikāmetleri tefkîk ve Ordu-yi hümâyûn'dan birer ikişer sâʿat infisâl ile Silistire ve Ruscuk semtlerine tahrîk olundular. Serdâr-ı ekrem müşârun ileyhimâyı tevkīr ve maʿiyyetlerinde olan asâkirin şevk u gayretlerini tevfîr irâdesiyle, birer defʿa ordularına biniş tarîkı üzere ʿazîmet ve sunûf-i askerîyi ʿatâyâ ve ru'esâsını iltifât ile ser-germ-i silâfe-i memnûniyyet eylediler.