Mûmâ ileyhim üç gün kadar Ordu-yi hümâyûn'da ârâm ü teneffüs ve bundan sonra mahall-i mükâlemeye varup, Prusya murahhaslarının matlûbât-ı kâminelerini tecessüs vakitleri geldiğini Sadrıaʿzam teferrüs edüp, ibtidâ Murahhas-ı Evvel ve Sânî'ye birer semmûr kürk ile birer müzeyyen esb ilbâs ü ihdâ ve sâniyen Nemçe ve Prusya elçilerine kezâlik bu muʿâmele icrâ ve baʿzı zâdegân ve tercemân makūlelerine dahi hilʿatler ve işleme yağlıklar iksâ vü iʿtâ ve şehr-i mezkûrun on birinci günü me'mûr oldukları mahalle semend-i ʿazîmetlerin tahrîk ü ircâ eylediler. Üç günden sonra Ruscuğ'a vürûd ve Serʿasker ʿAlî Paşa tarafından teksîr-i cünûd ile alay tertîb olunup, birer mahalle tenzîl ve lâzimeleri bâliğan mâ belağ ihzâr u tekmîl olundu. Bu haber karşuya münʿakis olup, Yergöğü Cenerali: “Eğer Murahhas-ı Evvel'de Büyükelçilik Pâyesi yoğise ibtidâ anlar bizi mülâkāt ile mesrûr ederler" cevabını irsâl ve ʿOsmân Efendi dahi rütbe-i mezkûrenın vücudunu beyân ve sâye-i Pâdişâhî'de o makūle pâyeleri âharlara ihrâz etdirmek kudreti olduğunu kemâl-i tesalluf ile âverde-i zebân-ı beyân eyleyüp, bu daʿvâyı musaddak hidmetlerinde olan tercemân, memhûr kâğıdıyla, [M2 221] Ceneral'e hakīkat-i hâli beyân eyledi. Ol vechile karşu karşuya mesfûr ile cüzvî münâkaşadan sonra Yergöğü'ye mürûr ve nasb olunan hıyâmda dâmen-efşân-ı huzûr olduklarına müteʿâkıb Ceneral-i mersûm tebrîk-i kudûm edüp, ʿavdetinde bir re's müzeyyen esb ile tatrîb ve ferdâsı Devlet-i ʿaliyye murahhasları dahi Ceneral'in çadırlarına varmağla, mesfûru tatyîb eylediler. Bir gün sonra Yergöğü'den hareket ve mâh-ı merkūmun selhinde Fokşan Kasabası kenârında tahsîs olunan mahalle ilkāy-ı raht-ı ikāmet eylediler.