Murahhaslar henüz Ruscuk'da iken, mübâhasesi sebkat ve Moskovlu'nun İkinci Murahhası'nda Büyükelçilik Pâyesi olduğu dahi tashîh olunup: “Yâsînî-zâde Efendi'nin fazîlet-i zâtiyyesi hasmın mechûlü ve pâyesi yok vâʿiz bir âdemdir” deyü, şâyed meclise idhâlden mümânaʿat zuhûr eder deyü, Serdâr-ı ekrem hazretlerine bu keyfiyyet tahrîr u işâret ve İstanbul Pâyesi'yle refîʿu'ş-şân kılınması ʿOsmân Efendi tarafından inhâ ve bu keyfiyyet südde-i ʿarz-ı aʿlâ kılınup, Efendi-yi mûmâ ileyh hakkında ʿavâtıf-ı ʿaliyye-i Cihânbânî erzânî ve pâye-i mezkûr ile dâric-i silm-i kâmrânî olmuşidi. Murahhaslar bir mahalle gelüp, herkes yedinde olan ruhsat-nâmesini ibrâz ve defʿ-i şübhe ile kâr-sâz oldukları ʿakabinde rütbe husûsuna sarf-ı kelâm ve Baş-murahhaslarda ve İkinci Murahhas olan Obreşkof'da Büyükelçilik rütbeleri olup, yedlerinde olan senedât ile rütbelerini tashîh ve Devlet-i ʿaliyye tarafından İkinci Elçi olan efendi-yi mûmâ ileyhin o meclisde henüz pâye fermânı resîde olmayup, karîben vürûd edeceği telmîh olunduysa dahi, Rusya murahhasları kavl-i mücerred ile mülzem olmayup, Pâye geleceğine dâ'yir Mu- rahhas-ı Evvel ʿOsmân Efendi mührüyle mahtûm sened aldıkdan sonra Pâye emri dahi vâsıl ve miyânede vukūʿ bulan muʿâraza müntefî vü zâyil oldu.