Anadolu Eyâleti'nde kapusuz eşkıyâsının kesreti ve fukarâ vü zuʿafâya vüfûr mazarratı bundan akdem gûş-güzâr-ı Sadr-ı ʿâlî-mikdâr olduğuna binâʾen, baʿzı elviye mütesellimleri o makūle eşrârın defʿ-i tesallutlarına havâle olunduysa dahi, me'mûl-i devlet üzere bir maslahat görülmeyüp, ebnây-ı sebîl ve fukarâ-yi raʿiyyet pâ-zede-i zulm-ü iʿtisâf oldukları tehakkuk ve bu fesâdın defʿini Sadr-ı âlî-kadr hazretleri dâʾimâ [M2 220] tefekkür ü teʾennuk edüp, âhır-i kâr birkaç seneden berü Kütahya'da Mütesellimlik ile şöhret-şiʿâr ve zabt ü rabt-ı memleketde izhâr-ı mâye-i cesâret eden Ömer Ağa'ya Kapusuz eşkıyâsını istîsâl ve o taraflardan defʿ-i ihtilâl etmek şartıyla, bâ-rütbe-i Vezâret Anadolu Eyâleti tevcîh ve Cidde Beylerbeyisi Adanalı ʿÖmer Paşa'nın dahi hüsn-i sülûk ü imtizâcı Şerîf-i Mekke ve Emîrü'l-Hac taraflarından tahrîr ile hakkında Vezâret recâ vü iltimâsları hayyiz-i kabûle resâ kılunup, târîh-i mezkûrda menşûr-i Vezâret tarafına firistâde ve muhavvel-i ʿuhde-i kifâyeti olan umûra kemâ-yenbagī ihtimâm eylemesi tarafına tenbîh ü ifade olundu. Sürücü taʿyîn olunan Vezîr İbrâhîm Paşa askerin verâsın alup, rebîʿulâhırın onuncu günü mu'asker-i hümâyûna resîde ve hidmeti makbûl ü pesendîde olduğundan, ferve-i semmûr ve iltifât-ı Sadru's-sudûr ile ferah-nâk ü mesrûr oldu. Bu defa Anadolu'dan munfasıl Vezîr Sunʿullah Paşa, Eğriboz Sancağı'na nâyil ve selefi Kelleci ʿOsmân Paşa, Muʿârız (Saros) Boğazı muhafazasına müntakıl oldu.