İnʿikād-ı mütâreke ile ʿAbdulkerîm Efendi'nin ʿavdeti ve Rusyalu tarafından taʿyîn olunan murahhaslar Yaş Kasabası'na gelüp, bu bâbda Merşal'in istiʿcâli hâvî vürûd eden mektûbu bundan akdem Rikâb-ı müstetâb-ı Cihândârî'ye ʿarz olunmuşidi. Rikâb-ı hümâyûn'dan Tevkīʿî bulunan Yenişehirli ʿOsmân Efendi, Murahhas-ı Evvel ʿunvânıyla mümtâz ve diyânete müteʿallık bir mâdde vukūʿ bulur ise cerh u taʿdîl etmek içün aʿlem-i belde olan Ayasofya Şeyhi, Murahhas-ı Sânî şânıyla ser-efrâz kılınup, o tarafda kâffe-i umûrları tensîk ve hatt u tirhâlleri hengâmında mesârıf-1 lâzımelerini mîrîden idâre içün Hâcegân-ı Dîvân-ı hümâyûn'dan Küçük İbrâhîm Efendi Defterdârlık maslahatıyla mûmâ ileyhimâya terfîk olunup, tevassut ümmîdiyle bunlar ile yola çıkan Nemçe ve Prusya elçilerine yirmi beşer bin guruş bedel-i taʿyînât verilüp, rebîʿulevvelin on ikinci Pazar günü Âsitâne'den hareket ve rebîʿulâhırın dördüncü günü Ordu-yi hümâyûn'a vürûd edecekleri haberi vâsıl-ı ser-menzil-i şöhret olup, Teşrîfâtî Efendi murahhasların istikbâline ve elçilerin su'âl-i [M2 219] hâtırına taʿyîn ve güzergâhları olan turuk u meʿâbire saf saf tavâyif-i askeri teşhîn ve irâ'e-i kuvvet-i Devlet-i ebed-karîn kılınarak, haymelerine îsâl ü temkîn kılındılar. Murahhaslar ile elçilerin su'al-i hâtırları Sadr-ı âlî-makām tarafından iltizâm olunup, otuzar miskāl ʿanber ve yüzer dirhem ʿûd birer kırmızı kîseye vazʿ ve işrâba ve fevâkih ve sâyir me'kûlâta müteʿallık birkaç tabla tertîb ü irsâl ile hâtırları tatyîb olundu.