Mora vakʿasında Sadrıaʿzam maʿiyyetinde bulunup, hıdemât-ı Devlet-i ʿaliyye'de izhâr-ı celâdet ve bu mukābelede ihrâz-ı rütbe-i Vezâret eden Tırhala Mutasarrıfı Vezîr ʿOsmân Paşa Ordu-yi hümâyûn'a vürûd ve alay gösterüp, iktisây-ı ferve-i semmûr ile nâyil-i inbısât-ı nâ-mahdûd oldu. Rûhâniyyet-i hazret-i Hayru'l-Mürselîn'den istimdâd ü istîʿânet kasdıyla Mevlid-i Şerîf kırâ'eti içün, erkân-ı devlet ʿakd-i rişte-i cemʿiyyet eyleyüp, nazm-ı güzîn-i Mevlid-i hazret-i Hayru'l-Mürselîn'i semʿ-i cân ile gûş ve kurta-i binâ-gûş-i hûş eylediler.