Silahdâr Ağası Kuru İbrâhîm Ağa bir merd-i câfî vü yâbis ve rutûbet-i mâliyyeden hâlî vü bâyis olup, bu esbâb ile iʿmâl-i neferâtdan ʿâciz ü muztarr ve ʿazli çokdan berü kalb-i Sadr-ı muvakkarda muzmerr olmuşidi. Birkaç seneden berü Ordu Kassâb-başısı olan ʿAli Ağa tüvânger ü mâldâr ve o makūle hıdemâtı ber-vefk-i me'mûl idâre eyleyeceği be-dîdâr olduğuna binâ'en, saferu'l-hayrın yirminci sebt günü Silahdâr Ağalığı'yla mazhar-ı mekârim ve selefi İbrâhîm Ağa [M2 212] me'zûnen Âsitâne tarafına ʿâzim oldu. Nehr-i Tuna'nın ahad-ı tarafeyni yed-i aʿdâda olup, Sünne Boğazı'ndan Bahr-i siyâh'a donanma ihrâcıyla sevâhil-i İslâmiyye'yi izʿâc eyleyecekleri havâdisi beyne'n-nâs dâyir ve o tarafların vücûb-ı muhâfazası vârid-i hâtır olup, Aydoslu Mehmed Hasekî'nin bu hıdmete liyâkati zâhir ve Edirne Bostancı-başısı nasb olunduğu takdîrde beş on bin âdem ile muktezî olan mahallerde isbât-ı vücûd eyleyeceği Rikâb-ı hümâyûn tarafından meczûm-ı ekâbir olduğu, Kāyim-makām Paşa tarafından bâ-emr-i hümâyûn Sadr-ı sütûde-şiyem hazretlerine ʿarz u tahrîr ve berü tarafda dahi re'y-i mezkûr pesendîde-i sagīr u kebîr olup, Hasekî-yi merkūm fi'l-hâl ihzâr ve saferin yirmi üçüncü günü Edirne Bostancı-başılığı ile mazhar-ı iʿtibâr kılınup, sûret-i me'mûriyyeti tafsîl olunarak, Edirne tarafına tesbîl olundu. Mora Muhassılı Vezîr Kelleci ʿOsmân Paşa zemânında baʿzı haydûd makūleleri reʿâyây-ı cezîreyi mübtelây-ı cevr ü iʿtisâf ve bu sebeble ehâlî-yi Mora miyânında ʿadem-i emniyyet âvâzeleri şâyiʿ olup, ebnây-ı sebîl ve sâyir kaviyy ü zaʿîf seyr ü ikāmetden istinkâf eyledikleri sâmia-res-ı Sadr-ı Âsaf-evsâf olmağla, müşârun ileyh maʿzûl ve Eğriboz Sancağı'na mevsûl kılınup, Mora Muhassıllığı ile Derbendler Başbuğu Vezîr ʿAli Paşa nâyil-i eʿazz-ı me'mûl oldu.