Mevkib-i hümâyûna [M2 210] müretteb olan asâkirin Nevrûz'dan evvel vürûdları, mukaddemâ menâşîr-i Sultânî ile taʿcîl ve mütâreke behânesiyle müteʾahhar olanları eşedd-i ʿukūbet ile tenkîl olunacakları tafsîl olunduğuna binâʾen, cümlesi mümtesil-i emr ü fermân ve fevc feve Şumnu'ya doğru teveccüh eyledikleri vâsıl-ı semʿ-i îkān olduğuna binâʾen, Serdâr-ı ekrem hazretlerinin dahi bir ân akdem Şumnu Sahrâsı'na darb-ı hıyâm ile icrây-ı lâzıme-i nakz ü ibrâm eylemesi iktizâ etmekle, muharremü'l-harâmın on altıncı günü sâlâr-ı gürûh-ı enbiyâ râh-nümây-ı mehecce-i rüşd ü Hüdâ Habîb-i kibriyâ Muhammedü'l-Mustafâ ʿaleyhi mine't-tahiyyâti ezkâhâ hazretlerinin ʿalem-i feyz- tev'emleri salât ü selâm ile sandûkasından ihrâc olunup, huzûr-i erkân-ı devlet ile sütûnuna bend ve hâzır olanlar bu saʿâdet-i bî-mânend ile şeref-mend ve şehr-i mezkûrun yirmi altıncı günü Sadriaʿzam ve Serdâr-ı ekrem hazretleri dahi sahrâda mansûb haymelerine müretteb alay ile pâ-nihâde-i vusûl ve sâyir müteʿayyinân-i mevkib-i hümâyûn dahi haymelerine duhûl ile mesâlih-i seferiyyeyi netîce-i efkâr u ʿukūl eylediler.