Şart-ı evvel: İki asker bulundukları mahallerde muhârebeyi terk edeler. Şart-ı sânî: Ruscuk'da ve Yergögü'de olan ruʿesây-ı askere imzây-ı sened ʿakabinde haber verilüp, Anadolu ve Rumeli askerine dahi buʿdlarına göre ifâde-i hâl oluna. Şart-ı sâlis: Tarafeyn askeri müddet-i mütârekede hâlleri üzere kalup, sevâhil-i Tuna'da bulunan tarafeyn askeri devletleri tarafından taʿyîn-i hudûd oluncaya dek, Nehr-i Tuna hadd-ı fâsıl olup, müceddeden ebniye ihdâs olunmayup, tahrîb olunan yerler ve bâ-husûs Babadağı ve Tulça ve İsakçı ve Maçin ve Hırsova taʿmîr olunmayup, [M2 209] hâlleri üzere terk olunalar. Şart-ı râbiʿ: Mütâreke ʿakdine Rusyalu tarafından Murahhas olan kimseye Âsitâne'ye ve andan Bahr-ı sefîd'de vâkiʿ Rusya donanması sergerdesine mütârekeyi iʿlân içün ruhsat verilüp, sergerde-i mesfûr dahi Devlet-i ʿaliyye donanmasıyla emr-i mütârekeye nizâm verüp, sevâhile ve Kırım'a Devlet-i ʿaliyye tarafından haber irsâliyle Tuna ve Turla boğazlarına İslâm gemileri girmeyüp, kâyinen men-kân Kırım sevâhili lîmânlarında dahi zikr-i âtî şurûtdan mâʿadâ bilâ-zarûretin görünmeyeler. Ve Tuna Nehri'nde mevcûd olan sefâyinin had taʿyîn olunan nehr-i kebîrde tûlen ve ʿarzan âmed ü reftlerine mümânâʿat olunmayup, tarafeyn halkı miyânında hudûs eden nizâʿ, zâbitleri maʿrifetiyle ʿadâlet üzere fasl ve lâzım gelen teʾdîbleri icrâ oluna. Şart-ı hâmis: Özi ve Kılburun kalʿalarına mütâreke temşiyeti haberi vusûlünden sonra asker ve mühimmât-ı seferiyye irsâl olunmayup, zahîre irsâli câyiz ola. Şart-ı sâdis: Zehâyir ile mahmûl sefâyin, muhâlif-i hevâ ve âhar gûne kazâ ile Kırım sevâhiline ve karşusunda vâkiʿ Basarabya tarafından karaya düşer ise tahlîsına vücûhla iʿânet olunup, mürûrlarına mümânaʿat olunmaya. Şart-ı sâbiʿ: Tuna ve Kırım ve Basarabya taraflarına zahîre ile mahmûl Rusya sefînesi dahi kazâʾen Devlet-i ʿaliyye hudûduna düşer ise ehâlî tahlîsına ve defʿ-i muzâyakalarına saʿy ile mürûrlarına mâniʿ olmayalar. Şart-ı sâmin: Gürcistan ve Kuban ve sâyir Anadolu taraflarında vâkiʿ iki tarafın askerine mütâreke haberi vusûlünde ehâlî ve askerleri şurût-ı mütârekeye riʿâyet ve her şehir ve kalʿa ve sâyir mahaller kimlerin yedlerinde ise o hâl ile kalup, taʿyîn-i hudûd iktizâ eden mahallerde şurût-ı mütâreke merʿî ola. Şart-ı tâsiʿ: İşbu muhâdenenin müddeti Boğdan ve Eflâk ve Bucak ve Kırım ve Kuban ve sâyir tarafeynin arâzîsinde bilâ-istisnâ ve kezâlik Kara-deniz sularında musâlaha murahhasları ʿakd-i meclis edinceye dek, tarafeyn serʿaskerlerinin ittifâkıyla mütârekenin imtidâdı câyiz ola ve emâkin-i bâʿîdeye bu haberin ʿale'l-fevr iblâğı mümkin olmayup, mevâziʿ-i karîbeye kıyâs olunmayarak, müddetleri bu senenin teşrîn-i evveli ibtidâsına dek mümtedd ola.