Mütârekeye Murahhas taʿyîn olunan ʿAbdulkerîm Efendi ve maʿiyyetinde olan Dürrî Efendi ve Dîvân Tercemânı İskerlet Ruscuğ'a vusûl bulup, vusûllerini karşu tarafa ihbâr ve Rusyalu tarafından taʿyîn olunan [İvan] Simolin nâm şahısdan fi'l-hâl âdem gelüp, vakt-ı [M2 208] mürûrların istifsâr etmişidi. Efendi-yi mûmâ ileyh dahi şehr-i mezkûrun on altıncı günü karşuya geçeceğini ifâde ve âdemîsini iʿâde ile yevm-i mezkûrda Yergögü tarafına ʿubûr ve kasabadan bir sâʿat ilerüde nasb olunan hıyâma nüzûl ʿakabinde Yergögü'de olan Ceneral tarafından ve Murahhas olan Simolin cânibinden resm-i hoş-âmedî icrâ ve hıdmetde olmak içün kırk nefer katana ve bir nefer mayor irsâliyle hukūk-ı riʿâyeti edâ eylediler. İki üç gün sonra Rusya Murahhası ile bir yere gelüp, birbiriyle icrây-ı hüsn-i muʿâmele ve ruhsat-nâmelerini mübâdele, ferdâsı mükâlemeye şurûʿ ve miyânelerinde otuz gün kadar münâkaşa vukūʿ bulup, mahall-i nizâ olan mevâd ve tahte'ş-şurût muzmer olan fesâd-ı çîre-destî-i Serdâr-ı ekremî ile cerh u taʿdîl ve kabûlü mümteniʿ olan îrâdât, delâyil-i ʿakliyye ile semt-i salâha tahvîl olunarak, sûret-i tevâfuk-i tahsîl olunup, saferu'l-hayrın yedinci günü temessükler terkīm ü tahtîm ve yek-dîgere teslîm ve Serdâr-ı ekrem ve Merşal taraflarından dahi tasdîk-nâmeler yazılup, maslahat-ı mütâreke tetmîm olundu. Bundan sonra resm-i mühâdâta mübâşeret ve Efendi-yi mûmâ ileyh ve maʿiyyetinde olanlara ber-vech-i tefâvüt üç tulum semmûr verilüp, berü tarafdan dahi Rusya Murahhası'na bir donanmış at ve sır-kâtiblerine bin guruş ve tercemânlarına yedi yüz guruş iʿtâ ve resm-i vedâʿ îfâsıyla ʿinân-ı mürâcaʿat irhâ olundu. Efendi-yi mûmâ ileyhin hıdmeti istihsân ve bir ferve-i semmûr ile mazhar-ı ihsân kılındığından başka, Baş-muhâsebe Pâyesi'yle mahsûdü'l-akrân ve Dîvân Kîsedârı dahi bu mülâbese ile dâhil-i katâr-ı Hâcegân oldu.