Beyne'd-devleteyn râbıta-bend-i nizâm olacak musâlahaya mukaddime olan mütârekenin bir ân akdem pezîrefte-i hüsn-i hıtâm olması tarafeynden bi'l-muhâbere karâr-gîr-i müzâkere olup, iki taraf murahhasları Yergögü'de ictimâʿ ve mükâlemeye şurûʿ ile defʿ-i ceng ü nizâʿ etmek mücâvebesi dahi inkıtâʿ üzere olup, lâ cerem Süvârî Mukābelecisi olan ʿAbdulkerîm Efendi mütâreke hidmetine taʿyîn ve yedine ruhsatnâme verilüp, kâffe-i me'ûneti taraf-ı mîrîden rü'yet ve maslahatı tehvîn olunduğundan başka, Devlet-i ʿaliyye ile düvel-i Nasârâ miyânında rişte-bend-i istihkâm olan ʿuhûd u şurûta bi'l-mümârese iktisâb-ı ʿilm-i icmâlî eden Dîvân Kalemi Kîsedârı Dürrî Efendi dahi mûmâ ileyhe hem-dûş-i murâfakat ve muharremul-harâmın beşinci günü Yergöğü tarafına ʿinân-tâb-ı teveccüh ü ʿazîmet oldular.