Sadâret-i Anadolu'da bir sene kadar icrây-ı ahkâm ve tesaddî-yi nakz u ibrâm eden ʿAtıf Mehmed Efendi tekmîl-i müddet ve yevm-i nasbından pâyesi muʿteber olmak üzere Anadolu Kadıʿaskerliği Şeyhulislâm-ı esbak Esʿad Efendi'nin mahdûm-i mükerremleri Şerîf Mehmed Efendi'ye tevcîh ü ʿinâyet ve Edirne Kazâsı'yla Birâder-zâde Yaʿkûb Efendi defʿ-i hüzn ü kâbet eyledi. İslâmbol Kadısı Yahyâ Efendi'nin muʿtâd olan müddet-i hükümeti resîde-i hayyiz-i intihâ ve Mekke-i mükerreme'den munfasıl İlmî Dâmâdı ʿAli Sâtıʿ Efendi gurre-i cumâdelâhıreden İstanbul Kadılığı ile feres-rân-ı meydân-ı iʿtilâ oldu. İstanbul Pâyesi olan ʿAli Paşa-zâde ʿAbdullah Bey ve sâbıkā Burusa Kadısı Mektûbî ʿAbdurrahîm Efendi birbirini teʿâkub ederek, merâret-i mevti zâyik ve dünyây-ı bî-bekādan vâreste-i dü-şâha-i ümniyye vü ʿalâyık oldular. Rumeli Kadıʿaskeri olan Sâlih-zâde Mehmed Emîn Efendi, müddet-i ʿörfiyyesin itmâm ve İvaz Mehmed Paşa-zâde İbrâhîm Beyefendi mükerreren Sadâret-i Rumeli ile tahsîl-i nâm eyledi. İstanbul Kadısı İlmî Dâmâdı ʿAli Sâtıʿ Efendi'nin taʿdîl-i kıyem ü esʿâr ve teʾdîb-i erbâb-ı ihtikârda cehli be-dîdâr ve butûʿ u rehâveti âşikâr olduğuna binâʾen, istîfây-ı müddet etmezden mukaddem ʿazl ile tenkîb ve Nakībuleşrâf olup, sâbıkā İstanbul Kadısı iken vazʿ u reftârı mücerreb-i baʿîd u karîb olan es-Seyyid İbrâhîm Efendi İstanbul Kazâsı'yla mükerreren tatyîb ve şevk u gayretine vesîle-i tezâyüd olmak içün Anadolu Pâyesi'yle tefrîh u tatyîb olundu. Şâm Kazâsı'nın vakt-i tevcîhi tekarrub ve şimdiden o tarîk-i sahîkın esbâbını tedârük ü temşiyete teʾehhüb lâzım geldiğine binâʾen, sene-i âtiye rebîʿulevveli gurresinden sâbıkā İzmir Kadısı Mukīm-zâde Dâmâdı İsmâʿîl Efendi, hükûmet-i Şâm ile makzıyyu'l-merâm oldu. Sene-i âtiye rebîʿulâhirında zabt etmek üzere Kazây-ı Haleb ile Receb-zâde Mehmed ʿArîf Efendi, nâyil-i matlab ve Kāzâbâdî-zâde Mehmed Râfiʿ Efendi Kuds-i Şerîf hükümetiyle ser-ber-âverde-i erbâb-ı rüteb oldu. [M2 207]