Zikr olunan kazâ Bağdâd rütbesinin dûnunda menâsıb-ı Devriyye'den olup, belde-i merkūmede zânû-zede-i sadr-ı istirâhat ve pertev-pâş-ı feyz ü bereket olan zât-ı Sürûşî sıfâta hürmeten ve kurb-i Saltanat-ı ʿuzmâda bulunduğuna rağbeten terfîʿ-i rütbesi münâsib görülüp, Devriyye menâsıbından ihrâc ve Mahrec iʿtibârıyla Haleb ve Selânik mevleviyyetleri miyânına idrâc olunup, nemâsı kalîl olduğuna binâ'en, Uzunca-âbâd Kazâsı ilhâkıyla nefʿ u cedvâsı teksîr olunup, Süleymâniye müderrislerinden Şeyh-zâde es-Seyyid Mehmed Refîʿ Efendi'ye seksen beş saferinde tevcîh olundu. Gurre-i ramazândan zabt etmek üzere Mısr-ı Kāhire ile sâbıkā Haleb Kadısı Râşid-zâde es-Seyyid İbrâhîm Edhem Efendi nâyil-i ferhat ve cumâdelûlâ gurresinden İzmir Kazâsı'yla Çalkandı-zâde ʿArif Mustafa Efendi raks-âver-i bezm-i meserret olup, gurre-i şehr-i rebîʿulâhırdan tasarruf şartıyla Üsküdar Kazâsı, Nâlî Kāynı-zâde es-Seyyid Ahmed Efendi'ye ihsân ve cumâde [M2 206] lâhıre gurresinden Kuds-i Şerîf Kazâsı, Gül Ahmed Paşa-zâde İsmâʿîl Beyefendi'ye tevcîh ile kadri muvâzî-yi eyvân-ı geyvân kılındı.