Müşârun ileyh merâkib ü revâhilden âzâde ve bu hâl ile mukaddem tevcîh olununan Trabzon'a ʿazîmeti mümkin olmadığı aʿzârını Rikâb ve Ordu-yi hümâyûn tarafına ifâde edüp, mansıbı tahvîl ve İnebahtı Sancağı tevcîhi ile mazhar-ı lutf-i cezîl oldu. Medîne-i münevvere Kazâsı'yla kesb-i şeref eden Elmâs Paşa İmâmı-zâde hulûl-i ecel-i mevʿûduyla vefât ve teslîm-i vedîʿa-i hayât edüp, bakıyye altı mâh müddetini Mısır Kadısı bulunan Hasan Paşa-zâde es-Seyyid Mehmed Saʿîd Efendi itmâm etmek şerefiyle be-kâm oldu. Mekke-i mükerreme Kazâsı'nın tevcîhi zemânı dahi hulûl eylediğine binâ'en, hükûmet-i mezbûre ile Şâm'dan maʿzûl Sır Kâtibi es-Seyyid ʿÖmer Efendi nâyil-i eʿazz-i me'mûl olup, Medîne-i münevvere Kazâsı dahi sâl-i âtiyede zabt etmek üzere sâbıkā Edirne Kadısı Halîl Efendi-zâde Ahmed Efendi'ye irâde olunundu.