Ziştovi muhâfazasında olan Mîr-i mîrân-ı kirâmdan Arnabûd Süleyman Paşa bir müddetden berü Ordu-yi hümâyûn'da sarf-ı tâb u tüvân ve me'mûr olduğu mahallerde kudreti kadar tekmîl-i şân-ı devlet-i ebed-bünyân edüp, bin nefer piyâde ve altı yüz nefer süvârîyi kendü mâlından tahrîr ile rûz-ı hızırdan kāsıma dek me'mûr olduğu mahalde istikrâr ve bu mukābelede rütbe-i vâlâ-yı Vezâret'le kâm-kâr olmak niyâzını tekrâr edüp, niyâzı müsâʿadeye makrûn ve şartına îfâ etmek üzere zilhiccenin on beşinci günü o rütbe-i celîle ile kadri efzûn ve Yanya Sancağı'yla mazhar-ı lutf-ı gûnâ-gûn olup, bu haber-i meserret mesmûʿ olduğu gibi birâderini vilâyetine irsâl ve müteʿahhid olduğu askeri vaktiyle celb edüp, me'mûr olduğu mahallerde isbât-ı vücûd ile efrâd-ı vüzerâdan maʿdûd oldu. Bundan akdem Ordu-yi hümâyûn'da vukūʿ bulan ihtilâl hasebiyle, sâyir askerî gibi zümre-i topçıyân dahi perîşân ve bu fende mehâreti zann ü husbân olunanlara noksan tareyân edüp, teksîr-i neferâta bâdî ve nev-âzmûdegân fenn-i mezkûrun tezâyüd-i şevkine sebeb-i ʿâdî olmak irâdesiyle Şumnu [M2 203] Kasabası hâricine birkaç kıtʿa hıyâm nasb olunup, Sadrıaʿzam Ağa Paşa ve Defterdar Efendi'yi istishâb ile zikr olunan mahalle zihâb ve mukaddemce ihzâr olunan topları iʿmâle mübâşeret ve nişân-gâha ʿadem-i isâbet ile Topçu-başı ve sâyir neferât ser be-zemîn-i şerm ü haclet olmuşlar iken, dördüncü defʿada dâne-i top mânend-i âh-ı mazlûmân-ı bî-günâh râster ve sîne-i nişân-gâh olduğundan, me'mûrlar kesb-i meserret ve defʿ-i hacâlet eyleyüp, her bâr tecribe vü imtihân ile evkāt-güzâr olmaları bâbında cânib-i Serdâr-ı ekremî'den tenbîh ü te'kîd ve ʿale'l-ʿumûm neferâta ʿatıyyeler verilüp, câme-i şevk u rağbetleri tecdîd olundu.