Zilkaʿdenin yirmi birinci salı günü Galata'da teferrüd eden altmış dört ve yirmi beş cemâʿatin yoldaşlarıyla kalyoncuların, cüz'î bir mâdde zımnında vâkiʿ olan münâkaşaları münâveşeye mübeddel olup, gitdikçe cemʿiyyetleri müzdâd ve iki tarafdan meterisler hafrıyla mütecâser-i şerr ü fesâd oldukları mesmûʿ ve Galata'ya âmed-şüd edenlerin bahran ve berren sebîlleri maktūʿ olarak mesâlih-i nâs giriftâr-ı ʿukde-i teʿassür ve bu keyfiyyet erkân-ı saltanatı şinâver-i deryây-ı tefekkür eyleyüp, her ne kadar ihtiyâr ve zâbitleri kelâm-ı maʿkūl ile ilzâmlarına meşgūl oldular ise dahi kârger olmayup, üç gün bu hâl müstemir ve ceng ü âşûb müstekar olup, encâm-ı kâr Çavuşbaşı ve Segban-başı Ağa o tarafa imrâr ve iki tarafın zâbitleri ihzâr olunup, cemʿiyyetleri perâkende olmaz ise âhar vechile tedârükleri görüleceği îmâ olundukda, hîn-i muhârebede [M2 202] fülkecilerden bir nefer zımmînin yeniçerilerden birini iʿdâm etdiği sâbit olup, mesfûrun salb ü izâlesi ile nizâʿa faysal verilüp, bu vechile cemʿiyyetleri tefrîk ve miyâneleri tevfîk olundu. Şehriyâr-ı zemân ve kahremân-ı kadrtüvân hazretlerinin serpûş-endâz-ı hukka-i dehân oldukları dürr-i şehvâr latîfe bu maʿreke hilâlinde zîb-i tabak-çe-i beyân olunduğu mütevâtir ü meşhûrdur.