Rütbe-i vâlây-ı Vezâret'le bi'l-fi'l Yeniçeri Ağası olan Süleyman Paşa'nın zabt-ı neferât ve te'dîb-i haşerâtda cilve-ger-i mecellây-ı zuhûr olan himmet-i ʿâlem-pesendi her hâlde rızây-ı devlete muvâfik ve reviş ü reftârı mizâc-ı feyz-imtizâc-ı Şâhâne'ye mutâbık olduğundan gayri, mukaddemâ kirâren ve mirâren sebt-i sahîfe-i beyân kılındığı vech üzere gûş-mâl-i eşkıyâ ve te'dîb-i erbâb-ı bağy ü şekāda yed-i tûlâ gösterüp, bu sebeble ibkāsına irâde-i menâyih-ifâde-i Mülûkâne teʿalluk etmekle, şevvâlin on birinci günü Kapu'ya daʿvet olunup, menkib-i istihkākı ferve-i semmûr ile tezyîn ve fî-mâ baʿd tanzîm-i umûr-i Ocağ-ı ʿAmire ile bakıyye-i serkeşân-ı ocağı kahr u istîsâle tekayyüd ü ihtimâm eylemesi, taraf-ı Serdâr-ı ekremî'den ber-vech-i te'kîd tavsiye vü telkīn olundu. Müşârun ileyh dahi hadd-i zâtında izhâr-ı fart-ı cesâret ve ʿAlemdâr ve Serdengeçdi Ağası olarak Rumeli Vâlîsi katelesini ve Bazarcık'da perde-bîrûn harekete mübâderet ve sevâhilde ednâ behâne ile îkāz-ı fitne vü âşûba mübâşeret edenleri yek-be-yek ahz ve hufyeten istîsâl ve pîrâmen-i ordusunda vâkiʿ hufrelere ilkā ile bâlâda îmâ olunduğu üzere, Kuyucu Süleyman Paşa nâmıyla şöhret-nümâ oldu. Yevm-i mezkûrun ferdâsı menâsıb-ı vüzerây-ı ʿizâm ibkā olunup, fekat Hudâvendigâr Sancağı Silistire Muhâfızı Vezîr Seyyid Hasan Paşa'ya tevcîh ve bir iki sancaklık mahal ile seferber olan iki nefer mîr-i mîrânın hâlleri terfîh olundu. Emânet-i Defter-i Hâkānî ile Vahdetî Bekir Bey nâyil-i sürûr u şâdumânî ve Rûznâmçe-i Evvel mansıbı ile Muhâsebe-i Evvel İbrâhîm Nazîf Efendi dilşâd ü hurrem ve Muhâsebe-i Evvel ile Penâh Süleyman Efendi mazhar-ı lutf u kerem olup, Sipâh Kitâbeti iki bin guruş ʿatıyye ile Süleyman Feyzî Efendi'ye ihsân ve Yeniçeri Kitâbeti ile Lâleli Mustafa Efendi hândân ve Silahdâr Kitâbeti Bekir Paşa-zâde ʿAtâ'ullah Efendi'ye [M2 201] tefvîz ve Mevkūfâtçılık ile ʿArabacılar Kâtibi Behcet-zâde Mustafa Efendi nigâh nevâziş ile termîz olunup, bâkī menâsıb dahi ber-vech-i münâsib seferber olanlara tevcîh ile tayy-ı defter olundu. Sadr-ı sâbık Silahdâr Mehmed Paşa'nın Vezâret'i ibkā vü takrîr ve Eğriboz mansıbı ile çeşm-i ibtihâcı tenvîr olunmuşidi. Gürcistan taraflarında ihtilâl peydâ ve o havâlîde sâhib-i şân bir vezîrin vücûdu iktizâ eylediğinden, Trabzon Eyâleti Rikâb tarafından müşârun ileyhe re'y olup, emr-i şerîfi Dîvân'dan tahrîr ve tarafına tesyîr olundu. Kalgāy Sultân Kırım'a gitmek ve ilgāy-ı teʿahhüd-i tarafeyn mukaddemâtını temhîd içün Çerâkise'yi taslît etmek ve bu sûretin imkân-ı âdîsi bulunmadığı takdîrde, Sevâhil-i Tuna'nın bir münâsib mahallinde kışlamak me'mûriyyeti, bundan akdem huzûr-i Şâhâne'de münʿakid olan meclisde karâr-gîr-i erbâb-ı re'y ü tedbîr olmuşidi. Kırım ülkesine sebîl-i vusûl mümteniʿ olduğundan gayri, insidâd-ı meʿâbir ü mesâlik ile derûnunda bulunanların ahvâline ıttılâʿ dahi mümkin ve mutasavver olmadığından, Sultân-ı mûmâ ileyh Şumnu'ya gelüp, Sadrıaʿzam ile mülâkāt ve hilʿat ve harclık ve esb-i müzeyyen ile mazhar-ı iltifât oldukdan sonra Varna taraflarını hıfz u hırâsete me'mûr kılınup, itmâm-ı maslahatı ile ol savba derre-zen-i ʿazîmet oldu.