Serdâr-ı ekrem'in meştâya duhûlü tertîbât-ı seferiyyeye şurûʿ vaktine tesâdüf edüp, bu sebeble mesârıfın kesreti ve ordu hazînesinde akçanın kemâl-i kılleti maʿlûm-i hazret-i Cihândârî olduğuna binâʿen, emr-i mühimm-i sefere sarf olunmak içün altun olarak bin üç yüz kîse Hazîne-i hümâyun'dan ifrâz olunup, Kapucu-başı Nûh Bey ile meştâya irsâl ve ordu hazînesine idhâl olundu. Vidin muhâfazası tevcîh olunan Ahmed Paşa pâ-der-i Rikâb-ı ʿazîmet iken, baʿzı emrâz burc-i bedenin intikāz edüp, mâh-ı merkūmun yirmi sekizinci günü fevti haberi resîde-i semʿ-i Sadâret-penâhî oldukda, Ruscuk Serʿaskeri ʿİzzet Ahmed Paşa'ya Vidin Muhâfızlığı ve Dağıstânî Vezîr ʿAli Paşa'ya Silistire Eyâleti'yle Ruscuk Serʿaskerliği tefvîz ve bir ân akdem hareket ve hıdmet-i me'mûrelerine kıyâm eylemeleri igrâ [M2 199] vü tahrîz olundu. Müteveffây-ı müşârun ileyh İlbasan sükkânından olup, bir zemân taşralarda geşt ü güzâr ve İstanbul'a gelüp, Bostâniyân Ocağı'na duhûl ile mutarassıd-ı müsâʿade-i rûzgâr olmuşidi. Giderek Bostancı-başılık ile ser-efrâz ve baʿde'l-ʿazl Emânet-i Surre ile müctâz-ı râh-ı Hicâz olup, ʿavdeti ʿakabinde Çavuş-başılık ve bir müddetden sonra Mîrâhûrluk ile kâm-kâr ve sefer hengâmında Sadrıaʿzam Kethudâlığı'yla nâmdâr olmuşidi. Seksen üç senesinde ʿazl ile Âsitâne'ye ʿazîmet ve bir müddetden sonra nâyil-i Vezâret olup, Silahdâr Mehmed Paşa'ya Kāyim-makām ve baʿdehû Tuna sevâhili muhâfazasıyla o taraflara ʿatf-ı zimâm edüp, târîh-i mezkûrda fevt ve medhûş-i sekret-i mevt oldu. Niğbolu Kasabası'nda medfûn ve makāma münâsib söz bulur bir Vezîr-i zâhiru's-sükûn olup, beyne'n-nâs evliyâ ve Ser-hoş Ahmed Paşa lakablarıyla iştihâr bulmuşidi.