Mukaddemâ baʿzı tasarrufât ile ocağlunun iki kıst mevâcibleri tetmîm ve yerlü yerine taksîm olunduğu, maʿrûz-i südde-i Şehriyâr-ı Cem-hadîm kılınmışidi. Müşârun ileyhin bu maslahat-ı ʿazîmeyi vakt ü hâle tatbîk ile tensîk-i ʿalâmet-tevfîk olduğundan, derûn-i ilhâm-meşhûn-i Cihândârî'de neşât ve mirât-ı temâsîl-i hakāyik-i eşyâ olan mirât-ı tâbnâk-ı Şehriyârî'lerinde suver-i inbisât rû-nümâ olmağla, mahzâ müşârun ileyhi taltîf ve taʿbîrât-ı bende-nüvâzî ile teşrîf irâde-i seniyyesiyle bir sevb aʿlâ semmûr ve bir hançer-i mücevhere mashûb hatt-ı bedîʿu'l-üslûb ʿAbdullah Paşa-zâde Saʿîd Bey ile meştây-ı Ordu-yi hümâyûn'a şeref-resân-ı vürûd olup, muʿtâd üzere istikbâl ve Serây-ı ʿâlî'ye alay ile îsâl olunup, Sadriaʿzam ve Serdâr-ı ekrem semmûr-i fâyizu's-sürûru zîver-i dûş-i ikbâl ve hançer-i süreyyâ-cevheri zîb-i meyân-bend-i iclâl edüp, kısteyn mevâcibinin ol vechile idâre ve tevzîʿi, mûcib-i tahsîn olduğunu mütebeyyin ve umûr-i seferiyyeye kemâ yenbagī ikdâm ü himmet olunmak vasâyâsını mutazammın hatt-ı hümâyûn dahi tahrîk-i leb-i edeb ile ehl-i dîvâna ismâ ve cümlesi ugūr-i Şâhâne'de bezl-i vücûd edecekleri emrinde tevâtuʿ u icmâʿ eylediler.