ʿİllet-i cünûn ile bundan akdem dâyire-i defterîden bîrûn olan ʿİsmet ʿAli Efendi yerine makrûn olan el-Hâc İsmâʿîl Efendi dahi fakd-i nakd ile mütehayyir ve idâre-i umûr-i defterîde ʿâciz ve mütezaccir olup, giderek sâbıkı gibi mübtelây-ı sevdâ ve esîr-i firâş-ı renc ü ʿanâ ve beş mâh bu hâl ile imrâr-ı subh u mesâ edüp, ʿâkıbet harmen-ı ʿömrü telef-şüde-i sarsar-i ecel ve Zilkaʿdenin yirminci günü zîr-i zemîn mûmâ ileyhe [M2 198] mesken ü mahal oldu. Rü'yet-i umûr-i defterî kime teklîf olunduysa, ahvâl-i selefe nazar ile feryâd ve defʿi bâbında etrâfdan istimdâd ederler idi. Mâliyye Tezkirecisi Dervîş Mehmed Efendi'de vücûd-i kābiliyyet ve mezîd-i şevk u rağbet maʿlûm-i Sadr-ı sütûde-haslet olduğuna binâʿen, ferdâsı kapuya daʿvet ve Şıkk-ı Evvel Defterdarlığı hilʿatiyle memnûn-i lutf u mekremet kılındı. Defterdâr-ı cedîd birkaç gün mürûrundan sonra civâr-ı kasabada vâkiʿ hadîkaya Sadrıaʿzam hazretlerini daʿvet ve müşârun ileyh dahi tenezzülen mahall-i merkūma rağbet edüp, Efendi-yi mûmâ ileyh tenâvül-i taʿâmdan sonra bir re's esb-i müzeyyen ile câme-i rikkatin tecdîd ve hâzır-bi'l-meclis olan zevât-ı müteşahhısaya dahi münâsib hedâyâ iʿtâsıyla hubb-i şegafların efzûn u mezîd eyledi. Levâzım-ı daʿvetden olan âlât-ı sâza ve hazara mahsûs savt u âvâza Serdâr-ı Ekrem iʿtibâr etmeyüp, hadîka-i mezkûrede şuğl-i kâr-zâr ve istihsâl-i cihet-i galebe-i düşmen-i mekkâr sohbetleriyle vakt-güzâr ve hîn-i hareketlerinde Defterdar Efendi'yi bir sevb-i semmûr ile vâye-gîr-i iftihâr eylediler. Defterdâr-ı merhûm Âsitâne'de tevellüd ile fârik-i miyân-ı mechûl ü maʿlûm oldukda, Baş-muhasebe Kalemi'ne yirmi üç sene müdâvim ve yetmiş dokuz târîhinde Zimmet Halîfeliği ile mazhar-ı mekârim olup, seksen beş senesinde Şıkk-ı Evvel Defterdarlığı'yla be-kâm ve târîh-i mezkûrda zâyik-i câm-ı hımâm oldu.