Düşmen-i dâl sevâhil-i Tuna ve Kırım ülkesini istîlâ hasebiyle, evvel-behârda mevcûd olan gemilerini Bahr-i siyâh'a ihrâc ve baʿzı mahalleri târâc ile ehl-i İslâm gemilerinde olan tüccâr ve sefere meʾmûrları izʿâc eyleyecekleri, zevâhir-i hâlden istinbât ü istihrâc olunup, bu makālât huzûr-i mevâhib-mahsûr-i Şâhâne'de birkaç defʿa zebân-âver-i erbâb-ı temkîn [M2 196] ü sebât olup, binâ’en ʿaleyh bu sâl-i ferruh-fâlde tertîb olunacak sefâyinin neferâtı teksîr ve üzerlerine bir Serʿasker nasbi tedbîr olunup, bu keyfiyyet taraf-ı Cihânbânî'den Serdâr-ı ekrem tarafına tahrîr olunup, bu hidmete lâyık u cedîr olan Belgrad Muhâfızı Vezîr Halîl Paşa'nın Âsitâne tarafına tesyîri tenbîh ve bu tertîb nezd-i Sadâret-penâhî'de dahi bir emr-i vecîh görülüp, Belgrad, Vidin Muhâfızı Vezîr Mehmed Paşa'ya tevcîh ve Belgrad'a vusûlü günü Halîl Paşa'nın rikâb tarafında lühûku mü'ekkeden îmâ olunup, betâ'etden tahzîr u tenzîh olundu. Vidin serhaddi mukābele-i aʿdâda vâkiʿ olup, hifz u hirâseti min ehemmi'l-mehâmm ve bir Vezîr-i sütûde-tedbîr taʿyîni ile müdâfaʿa ve tecavüze ihtimâm havâlî-kerd-i zamîr-i Sadr-ı vâlâ-makām olmağla, Niğbolu muhâfazasında olan Kāyim-makām el-Hâc Ahmed Paşa bu maslahatın eri ve pîşe-zâr-ı celâdetin gazanferi olup, muhâfaza-yı mezkûreye me'mûriyyeti istihsân ve bir ân akdem vusûlü bâbında ısdâr-ı emr-i ʿâlî-şân kılındı. Bu tasarrufât ile Niğbolu muhâfızdan hâlî ve Çeteci hafîdi Vezîr es-Seyyid Ahmed Paşa'nın o tarafa taʿyîn olunmasıyla tahsîl-i itmi'nân-ı ehâlî kılındığından gayri, Tutrakan muhâfazasına dahi Amasyalı Halîl Paşa irsâl ve mehmâ-emken o tarafların esbâb-ı istihkâmı istihsâl olundu. Halîl Paşa Belgrad'dan hareket ve seyr-i serîʿ ile Âsitâne'ye gelüp, umûrunu rü'yet ve donanma sefâyini dahi techîz olunup, Bahr-i siyâh Serʿaskerliği hılʿatini huzûr-ı Şâhâne'de iktisâdan sonra me'mûr olduğu savba sükkân-ı ʿazîmeti tehzîz eyledi. Bir iki seneden berü Vezîr ʿAbdî Paşa'nın vukūʿ bulan muhârebelerde tarîf ü telîd ve ʿatîk u cedîd her neye mâlik olduysa zâyiʿ ve nâ-bedîd olup, el-hâletü hâzihi Bazarcık ve Hırsova ve Babadağı etrâfını muhâreseye me'mûr ve her cihetle ikdârı matlûb-ı Sadru's-sudûr olmağla, mümkin mertebe iʿâne ile muzâyakası mündefiʿ ve tahvîl-i mansıb havfı derûnuna vâkiʿ olmak haysiyyeti ile mutasarrıf olduğu Rumeli Eyâleti dahi kubeyl-i tevcîhâtda ibkā olunarak, istibdâl-i mansıb haşyeti derûnundan mürtefiʿ kılındı.