Nüfûs-i rezîle erbâbı mutâlebe-i mâl ve temennî-yi tereffüh ile “bi'l-guduvvi ve'l-âsâl” üftâde-i hılâb-ı vehm ü hayâl ve dâm-efgen-i kemingâh-ı ihtiyâl olup, tahsîl-i mâl ise teʿaddî vü tecavüze ve baʿzan izhâk-ı rûh ve itlâf-ı nefs etmeğe muhtâc olmağla, garaz-ı mezkûre vusûl zımnında ne derecelerde zarar teʿayyün eyleyeceği zâhir olup, bu takdîrde umûr-ı siyâsiyyesini muhafaza eden düvel be's-i şedîd ile [M2 191] muttasıf olan hadîdi kırâbından sell ile o makūleleri tedmîr ve mülkünü tathîr hikmete muvâfık bir fi'l-i serîʿu't-te'sîrdir. Havâss-ı nâsda dahi bu hâlet nümâyân ve ser-i kâra geldikleri gibi müddet-i kalîlede nakd-i firâvân cemʿiyle tarsîs-i bünyân ve tezyîn-i eyvân eylediklerinden gayri, zâhir ve hafî envâʿ-ı mücevherât ile ceyb-i vebnân ve kîse vü enbânların mele'ân edüp, bu tecemmül ü tezeyyüne mansıbları îrâdı vefâ etmeyüp, lâ-mehâle mîrîye muzır ve mesâlih-i devlete muhil umûr vâhîmü'l-ʿâkıbeye iktihâm edecekleri ednâ mülâhaza ile maʿlûm olan mevâddandır. Sâyesinde mütenaʿîm oldukları devlete ihânet ü iltimâs, envâʿ-ı refâhiyetle Şehriyâr-ı ʿasr dâme fi'l-ʿizz-i ve'n-nasr hazretlerine cinâyet edenleri Hak celle ve ʿâlâ islâh ve niʿmet-i kanâʿatle iflâh eyleye âmîn.