“An-asl hâki âmihte-i şerrü fesâd ve ehâlîsi mâye-i lecâc ü ‘inâd olan Deli-orman ve Hâcı-oğlu Bazarı ve Şumnu ve Hezârgrad ve sâyir kazâlarda kâyin olanların ba‘zısı seferler takrîbi ile dâyire-i itâʿatden gerden-keş ve fukarâ ve ebnâ’-i sebîli dendân-ı tîz- i-gezend ile ledğ u izʿâcda mânend-i mâr-ı münakkaş olduklarından gayri, rîş-i sefîdân ve zâbitlerinin taht-ı itâʿatlarından hurûc ve nasîhatlarını ʿadem-i kabûl ile zirve-i ʿutüvv u istikbâra ʿurûc ve kemâl-i galebe ile havf-i cezâdan masûn ve rûz u şeb fetk ü batş ile tavr u reftâr-ı bâgiyâneleri dâyire-i hadden bîrûn olup, bu esbâb ile Yergöğü ve Bazarcık ve Tuna havâlîlerinde zikri sebkat etdiği vech üzere şekāvete cesâret edenlerin vasıta-i tîğ-i siyâsetle dimâʿ-ı fâsideleri isâle vü ihrâk ve münteşir-i âfâk olan ebâtîl-i aʿmâlleri dest-yârî-yi hüsn-i tedbîr ile imhâk olunmak rekîz-i zamîr-i Sadr-ı sütûde-ahlâk olmağla, o makūle zaleme ve ehl-i fesâdı kâr-âzmûde ve mukaddem gümâşteler ile sırran ve ʿalenen kahr u istîsâl ve sefer ü hazarda bağy ü şikākdan gayri ellerinden bir şey gelmeyen müfsidleri yek be yek iʿdâm ile sevâhil ü serhadleri âzâde-i şûriş ü ihtilâl eyledi. Deli-orman ve Arnabûdluk ber-minvâl-i muharrer menbaʿ-ı şûr u şerr olup, birkaç senede bir defʿa nizâm zımnında kaviyyü'l-iktidâr vüzerây-ı ʿizâmın me'mûriyyetleri serkeşleri kahr ve fukārayı âzâde-i zulm ü cevr etmek hikmetine mebnî olup, fi'l-hakīka bu nizâmdan sonra bir müddet tahsîl-i âsâyiş ve indifâʿ-ı mezâlim hâletleri meşhûd ve zıll-i re'fet bî-tâb ü tâkat olanlar hakkında memdûd olur idi.