Sadrıaʿzam Silahdâr Mehmed Paşa mesned-i Sadâret'e pâ-nihâde-i iʿtilâ olduğu günden ʿazline dek bi-hikmetillâhi Teʿâlâ Tulça ve İsakçı taraflarına aʿdâ birkaç defʿa geçüp, eczây-ı cisr ve zahîre enbarlarını ifnâ ve Âsitâne-i saʿâdet'den tertîb olunan altmış kadar sefîneye meşhûn sunûf-i askerîyi iʿmâle muvaffak olamayup, sefînelerin baʿzısını düşmen ihrâk ve baʿzısını İsmâʿîl Kasabası'na götürmek takrîbi ile Devlet-i ʿaliyye'ye küllî rahne etdikleri rüveydâ olup, Yergöğü tarafından zuhûr eden nusrat ile fi'l-cümle teşeffî-yi gayz hâsıl olmuşiken, küffârın Tulça ve Maçin taraflarından zuhûru ve o havâlîyi gāretden sonra sâbıklarda manzûr olduğu gibi fi'l-hâl karşu tarafa mürûr edeceğini tevehhüm edüp, vaktiyle Ordu-yi hümâyûn muhâfazasından ve meteris ve sâyir esbâb-ı menâʿat tedârükünden gaflet ü ihmâl ve her hâlde serʾaskerlere ehem olan riʿâyet-i hazm ü ihtiyât meşgalesinden iʿtizâl edüp, lezâyiz-i etʿimeye harîs u menhûm ve nefâyis-i melâbis ü kisâya cüll-i himmeti masrûf olduğu maʿlûm olduğundan gayri, nüfûzu zâyil ü müntefî ve şûʿle-i cevvâle-i sevreti muntafî ve bundan böyle dîn ü devlete müfîd [M2 187] tarafından bir tavr-ı nâfiʿ bürûzu mülâhazadan baʿîd olduğuna binâʾen, ʿazli cây-gîr-i zamîr-i Pâdişâh Felâtûn-tedbîr oldu. Müşârun ileyh Sipehsâlârlık hatb-ı cesîmi böyle dursun hod-be-hod maslahat-ı ʿâmmeyi idârede ʿâciz iken, şöhret-i şâyiʿası Sadâret'e takrîbini müstelzim olup, maʿâzallâh bekāsı iki seneden sonra zuhûr edecek hâdiselerin hemân bu sâl içinde meşhûd olmasını mûcib olup, bu sûretde ʿazli, usûl-i hikmete mutâbık ve kānûn-i devlete muvâfık idi.