Ordu-yi hümâyûn'un Edirne'de kışlaması me'mûl ve şimdiden etrâf ü eknâfın muhâfazası emr-i maʿkūl olduğundan Deli-orman ve sâyir mahallerden celb-i asâkir ve geldikçe ru'esâları hılʿat ü nevâziş ile mutayyebü'l-hâtır kılınup, Karasu'da mütemekkin Vezîr ʿAbdî Paşa maʿiyyetine ceste ceste tesyîr ve Edirne'de kışlamak hisâbı üzere ʿAbdî Paşa Bazarcık'da ve Dağıstânî ʿAli Paşa Karasu'da ikāmet etmek emri re'y ü tedbîr olunup, kasd-ı mezkûr izmâr ve Bazarcık ehâlîsi tevhîş olunmamak kasdıyla kasaba-i mezkûrede ittihâz-ı meştâ revişleri izhâr olunur idi. Zîrde tafsîli îrâd olunacak vech üzere Bazarcık'da kışlamak talebiyle ehâlîden zuhûr eden harekât-ı nâ-bercâ zâhir- de Edirne ʿazîmetini ilgā edüp, müşârun ileyhimâ dahi o esnâda mevkib-i hümâyûna gelmiş bulunmalarıyla, me'mûriyyet-i hakīkiyyeleri ihfâ-i beyân ve şimdilik zâhirde ʿAbdî Paşa Karasu'ya ve Dağıstânî ʿAli Paşa Köstence'ye meʿmûr kılındıkları iʿlân olunup, şaʿbânın dokuzuncu günü müşârun ileyhimâ iktisây-ı hilʿat ve her biri savb-ı me'mûruna ʿazîmet eyledi.