Baş-muhasebeci olan Ahmed Rıfat Efendi merîz ve mansıbı bi'l-vekâle âhara tefvîz olunmak üzere meştâ me'mûl olunan Edirne'ye ʿazîmet içün rûy-i efgen-i hazîz-i recâ ve mes'ûlüne müsâʿade rû-nümâ olmuşidi. ʿAzîmetinden bir iki gün sonra mansıbı, Anadolu Muhasebecisi İbrâhîm Nazîf Efendi'ye tevcîh olunup, Anadolu ile Mustafa Efendi, Beylikcilik'den ihrâc ve ber-vech-i ilhâk hizmet-i mezkûre ile Kethudâ Bey Kâtibi Seyyid Mehmed Hayri Efendi mahfûf-i sunûf-i ibtihâc kılındı. Defter Emîni Velî Efendi ʿan-asl bîmâr ve Babadağı vakʿasında ʿilleti müştedd olarak Bazarcık'da terk-i hayât-ı müsteʿâr edüp, Nişancılığ'ın vâridâtı kalîl ve mutasarrıfı olan ʿAbdullah Efendi bâr-girân-ı mesârif ile sergerdân ü sefîl olup, defter emîni nasbına dek hâsılatını kabz etmek üzere cihet-i maʿîşetine vüsʿat verildi. Merhûm ebnây-ı A'câm'dan olup, bin yüz yirmi târihlerinde Dâmâd Hasan Paşa halîleleri Hadîce Sultân ile İznikmid'de ikāmet eder iken, vâlideleriyle Harem hizmetine taʿyîn ve Âsitâneye geldiklerinde, Sultân Ahmed Hân ʿaleyhi'r-rahmetü ve'l-gufrân hazretleri Harem-i Serây-ı Sultânî'de merkūmu müşâhede ile Harem-i hümâyûn'a alup, baʿdehû taşra ihrâc ve giderek Hazîne Kethudâlığı'yla bâzâr-ı iʿtibârı karîn-i revâc kılınmışidi. [M2 185] Sultân Mustafa Hân subbet ʿaleyhi şe'âbîbü'l-ʿafvi ve'l-gufrân hazretlerinin devr-i bî-cevrlerinde Baş-muhasebecilik ile çerâğ ve ber-minvâl-i muharrer Defter Emîni iken ʿâlem-i fânîden dest-şûy-i ferâğ oldu.