Bâlâda tahrîr olunduğu vech üzere, Vidin Serʿaskeri Sadr-ı esbâk Muhsin-zâde Mehmed Paşa Kulle semtine vürûd ve Niğbolu muhâfazasında olup, Moskovlu ile birkaç defʿa vukūʿ bulan muhârebelerde yararlığı meşhûd olan Kāyim-makām el-Hâc Ahmed Paşa dahi ordu-yi müşârun ileyhe inzımâm ile Yergöğü Sahrâsı'na darb-ı hıyâm etmişler idi. Teke Mutasarrıfı ve Silistire Muhâfızı olan Hasan Paşa'ya dahi hükm-i cihân-mutâʿ gönderilüp, o havâlînin darb ü harbe kādir olanlarını cemʿ ve karşuya güzâr ve Serʿasker-i müşârun ileyhin emr ü re'yine intızâr üzere olması işʿâr olunup, bu takrîb Yergöğü Sahrâsı'nda otuz bine karîb asker ihtişâd etdiyse dahi, asâkir-i mezkûrenin ekserîsi süvârî olup, Bükreş niyyetinde olduklarından piyâdeye mess-i ihtiyâç ve bu sebeble cemʿ-i piyâde içün Serʿasker Paşa etrâfa âdemler ihrâc etmişidi. Müşârun ileyh fi'l-asl umûrunda hâzim ve mizâc-ı askerîde olan fesâda câzim olup, tîz elden hareketi tecvîz ve iʿtimâda sezâ olmayan böyle bir asker-i gayr-i mutâviʿ ile Bükreş üzerine bilâ-tedbîr ʿinân-ı teveccühü tehzîr etmediğini eclâf-ı leşker hiss ile Ordu Ağası üzerine hücûm ve tûl-i ikāmetden şikâyet eylediklerinde: “Cemʿ-i piyâde ile iştigāl şimdiye dek mâniʿ-i ceng [M2 184] ü kıtâl olup, sizin ekseriniz yeniçeri olup, ocağ-ı mezbûru fi'l-asl piyâde askerinden müretteb olmağla, esblerinizi fedâ ve kānûnunuz üzere râcilen ihtiyâr-ı ceng ü vegā ederseniz, hemân şimdiden harekete hâzır u müheyyâyuz” deyerek ilzâm ve birkaç gün dahi bu münâkaşalar ile imrâr-ı eyyâm olunup, bilâhire müşârun ileyh Yergöğü'de ikāmet ve ilerüye kuvvet vermek üzere meşveret olunup, ʿİzzet Ahmed Paşa ve Kāyim-makām el-Hâc Ahmed Paşa Serʿasker ve dümdâr olarak Bükreş Kasabası'nda olan aʿdâ üzerine taʿyîn ve mevcûd olan piyâde vü süvârî ile heyet-i ictimâʿiyyeleri tarsîn olundu. Piyâdenin kılleti ve ruʾesânın yek-dîgere muhâlefeti yevm-i maʿrekede kazâyây-ı mağlûbiyyeti intâc edüp, süvâriyân-ı İslâm Kulle ve Vidin tarafla- rına ve piyâdegân Yergöğü tarafına firâr ve müşârun ileyhin ordugâhında ferd-i âferîde kalmayup, nâ-çâr bir zevraka süvâr ve Ruscuğ'a güzâr eyledi.