Peleng-i pîşe-zâr-ı ceng ü kârzâr olan Vezîr ʿİzzet Ahmed Paşa'nın Yergöğü muhârebesinde igtinâm eylediği yedi kıtʿa musannaʿ top [M2 179] ve yüz altmış harbeli tüfeng ve üç kıtʿa mükemmel cebehâne ʿarabası ve beş tranpete ve hayyen ahz eylediği bir nefer mayor ve iki nefer yüzbaşı ve on bir nefer sultâtı mahdûm-i mükerremleri Kapucu-başı ʿAbdullah Bey ile Ordu-yi hümâyûn'a îsâl ve mîr-i mûmâ ileyh taraf-ı Âsafî'den mazhar-ı birr ü nevâl olup, hılʿat-i fâhire ile teşrîf ve maʿiyyetinde olanlar dahi hılʿat ü çelenk ile taltîf olundu. Müşârun ileyhin mahdûmlarına kemâl-i ikrâm matlûb-i Sadr-ı vâlâ-makām olduğuna binâʾen, yaldızlı bir kıtʿa çelenk dest-i Âsafâne'leriyle ser-i iftihârına âvîhte ve bir donanmış at ve iki bin beş yüz guruş ihsânıyla sâyir umûrunu tanzîm ü perdâhte etdikden sonra getirdüğü edevât-ı ceng ve üserâyı maʿan Âsitâne'ye irsâl ve iktizâ eden tahrîrâtı dahi yedine iʿtâ ile sunûf-i birr ü ihsânı hakkında ikmâl eyledi. Mîr-i mûmâ ileyh toplar sebebi ile ihtiyâr-ı meşy-i hafîf ve Bazarcığ'a geldiği gün Babadağı vakʿası zuhûruyla Sadrıaʿzam Bazarcığ'ı teşrîf edüp, bu vâkıʿa-i fâciʿa mîr-i mûmâ ileyhi mütegayyiru'l-hâl ve ikdâm ü ihcâm husûsunu suʾâl eyledikde, Ordu-yi hümâyûn ile top olmayup, lâzım olur ihtimâliyle topların tevkīfi irâde ve yedinde olan tahrîrât istirdâd olunarak pederi tarafına iʿâde olundu.