Baş-muhasebeci olan Yesrî Ahmed Efendi civâr-ı rahmet-i Hakk'a intikāl ve mansıbı kabûl-i inhılâl edüp, cumâdelâhırenin yirmi beşinci günü mansıb-ı mezkûr ile Atlı Mukābelecisi Rıfat Ahmed Bey mesrûr ve anın mansıbı ile Mevkūfâtî ʿAbdulkerîm Efendi ve anın mansıbı ile Mâliyye Tezkirecisi Feyzî Süleyman Efendi nâyil-i etemm-i hubûr olup, Mâliyye Tezkireciliği dahi Defterdâr Kîsedârı Dervîş Mehmed Efendi'ye izâfe ile gusn-i ikbâli ratîb ve câme-i ʿizz ü rıfʿat-i cedîd ü kaşîb kılındı. Bir müddetden berü Şâm Vâlîsi olan Vezîr ʿOsmân Paşa rızây-ı devlete muvâfık hizmet ile şöhret-nümâ olduğundan, hakkında iltifât-ı Şâhâne mebzûl ve Emâret-i Hâc imtidâdıyla nâyil-i eʿazz-i me'mûl olduğundan başka, iki oğlu dahi Mîr-i mîrânlık rütbesin ihrâz ve bey- ne'l-akrân kesb-i dest-mâye-i taʿyîn ü imtiyâz etmişler idi. Tetâvül-i dühûr ile cemʿ-i mâl-i mevfûr edüp, mukavvimler ile müşterek ve kesret-i nemâ ile sîmurga sinek ve feleke kelek demeye başlayup, Mısr-ı mahrûse'de Şeyhu'l-beled ve bağy ü şikāka nasb-ı rasad eden ʿAli Bey ile ber-muktezây-ı hıkd ü hased muʿâraza vü münâkaşaları hâric ez-derece-i resm ü hadd olup, tarafeyn birbirini sû-i hareketle tahrîr ve nesâyih-i devlet zegāyin-i derûnlarını ʿadem-i tagyîr ve ʿAli Bey zî-kuvvet ü mâl bulunmak hasebiyle, birkaç defʿa [M2 178] Mısr-ı Kāhire'den asker ihrâc ve Gazze ve Remle semtlerini tâht ü târâc ve müşârun ileyhin askeriyle dahi mukāvemet ve îrâ'-i zend-i müşâceret eylediklerinden gayri, ʿAli Bey ʿAkka etrâfında müstekin olan Tâhir ʿÖmer'i dahi ifsâd ve Devlet-i ʿaliyye'nin umûr-i sefer ile iştigālini fursat ʿaddiyle, birbiriyle rabt-ı peyvend-i ittihâd etmeleriyle, miyânelerinde şikāk-ı küllî be-dîdâr ve müşârun ileyh bi'n-nefs cemʿiyyet-gâhlarına varup, muhârebeye ibtidâr ile münhezimen gerüye çekildiği ahbârı vâsıl-ı derece-i iştihâr olup, her cânibe sevk-i asker ile sarf-ı hazâyin derkâr iken, himmet-i Şâhâne'ye katʿâ fütûr ʿârız olmayup, o tarafa dahi mükemmel asker taʿyîn ve sâbıkā Gürcistan Serʿaskeri Vezîr Nuʿmân Paşa'nın kāmet-i liyâkati Şâm Serʿaskerliği hılʿat-i pür-behcetiyle tezyîn ve Rakka Eyâleti dahi zamîme-i ʿinâyet-i Şehriyâr-ı Cem-temkîn olmuşidi. Müşârun ileyh Rakka'ya varup, umûr-i Serʿaskerî'yi ru'yet eder iken, ʿAli Bey ümerâdan birini Şâm'a irsâl ve ʿOsmân Paşa gāfil iken şehre duhûl ve mutesaddî-yi ceng ü cidâl olup, müşârun ileyh mukāvemetden ʿâciz ve ser-gerdân ve nâ-çâr şehri bırakup, gürîzân oldukda, Şâm Ağası kalʿadan top ve tüfeng yağdırup, müdâfaʿa ve mukāraʿada izhâr-ı sebât ve merdânegî eylediği esnâda, Mısır askeri beyninde ʿAli Bey'in fevti haberi şâyiʿ ve bu sebeble miyânelerinde ihtilâl vâkiʿ olup, ehl-i Şâm dûçâr-ı hasâret ü âlâm olmayarak Mısrîler bî-sabr u ârâm cânib-i Kāhire'ye ʿatf-ı zimâm eylediler. Mısır Şeyhu'l-beled'i ʿAli Bey'in tefarʿun ve şekāveti ʿOsmân Paşa'nın kusûr-i tedbîr ve sû-i hulkundan neş'et eylediği, zebân-güzâr-ı erbâb-ı iʿtibâr olduğuna binâʾen, Şâm'dan ʿazl ve Karaman Eyâleti'ne vasl olunup, Emâret-i Hacc, ʿAzm-zâde Vezîr Mehmed Paşa'ya ve oğullarının mutasarrıf oldukları Cerde Başbûğluğu ve Sayda mansıbı dahi üzerlerinden alınup, birine Niğde ve diğerine Akşehir sancağları tevcîh ü ihsân ve Cerde Başbûğluğu Musul inzımâmıyla bâ-rütbe-i Vezâret ʿAbdulfettâh Paşa'ya ve Sayda Eyâleti Sunbât-zâde Mehmed Paşa'ya tefvîz ile iʿlâm-ı hâli şâmil taraflarına ısdâr-ı fermân-ı celîlü'l-ʿunvân kılındı.