Tâyife-i Rus, Deli Petro ve risâlesinde temhîd olunan mukaddimât-ı fâsideyi refte refte icrâ edüp, risâlenin ʿillet-i gāʼiyyesi olan Kırım Ülkesi'ni tergîb ü terhîb sûretinde teshîr ve beyne'd-düvel cârî olduğu gibi ibtidây-i emrde serbestlik ʿunvânıyla ehâlîyi tevkīr ve giderek zabt vesâyilini [M2 177] tedbîr etmek garazlarını teysîre başladılar. Binâʼen ʿalâ zâlik miyânede olan ihtilâf, mübeddel-i i’tilâf olmak sûretinde İmperatoriçe tarafından tahrîr olununan mektûb bu felâket-zede ile Ordu-yi hümâyûn'a gönderilüp, hılâl-i râhda Serʿasker Paşa'nın dahi bir boğça tahrîrâtı gelmekle, cümlesi Babadağı'nda Serdâr-ı ekrem'e teslîm ve vukūf derecesinde ahvâl-i düşmen ifâde vü tefhîm olunmuşidi. Takrîr-i ʿâcizânem manzûr-i Şâhâne olup, Âsitâne-i saʿâdet'e celb ü ihzâr irâdesi taʿyîn ve Mektupçu Efendi dahi o hilâlde pâ-der-rikâb bulunduğundan maʿan Âsitâne'ye gelüp, takrîren ve tahrîren her hâl tafsîl ü icmâl ve Serʿasker-i müşârun ileyhe yedi bin beş yüz guruş ʿatıyye-i hümâyûn zuhûr edüp, Sadrıaʿzam tarafından dahi iki kāt mükemmel libâs izâfe olunarak, îsâli bâbında Mareşal'a hitâben Sadr-ı müşârun ileyh tarafından mektûb tahrîr ü irsâl olundu.