Silahdâr Ağalığı'ndan infisâl ve Tırnovi'de ikāmet ile mazhar-ı takrîʿ u istiskāl olan ʿArabgîrli İbrâhîm Bey hakkında ʿukde-i infiʿâl karîn-i inhilâl ve bâ-rütbe-i Mîr-i mîrânî Selânik Sancağı'yla nâyil-i dest-mâye-i ʿizz ü ikbâl ve bu teveccüh-i cedîd rütbe-i Vezâret ile be-kâm olmasına berâʿatü'l-istihlâl oldu. Muʿasker-i hümâyûnda [M2 174] tûl-i meks ü ikāmet sebeb-i tekevvün-i ʿufûnet olup, bu takrîb efrâd ve cumûʿ-i nâsda katʿî çok kimse mahmûm ve hadden bîrûn kimseler dâyire-i hestîden maʿdûm olup, bunlardan ʿilel-i müzmineye mübtelâ ve dûr u dırâz muhtâc-ı müdâvâ olanlar yâ Edirne ve yâhûd Âsitâne'ye gitmek bâbında dest-bâz-ı recâ olmalarıyla, haklarında müsâʿade-i insırâf rû-nümûn ve bi'l-fiʿl Baş-muhâsebeci olan Yesrî Ahmed Efendi ve Başbâkī-kulu Mehmed Emîn Ağa-zâde'nin zâdesi Tâhir Ağa ve sâbıkā Masraf Kâtibi Kîsedâr Yûsuf Efendi ve bunlara mümâsil baʿzı kimseler Edirne ve Âsitâne tarafına ʿazîmete meʾzûn oldular. Bu sûretde baʿzı mansıb münhal ve mutasarrıflarının fıkdânıyla umûr-ı Mâliyye ve erbâb-ı mesâlih muhtell olmağla, Cizye Başbâkī-kulu Kara-kulak ʿAbdî Ağa'ya bi'l-fiʿl Başbâkī-kulluğu ve Hekîm-zâde Hazînedârı Ahmed Ağa'ya, Cizye Başbâkī-kulluğu tevcîh ve Tezkire-i Evvel Münîb İbrâhîm Efendi'ye, Baş-muhâsebe Vekâleti tefvîz olunup, evrâk-ı mühimmeyi temhîr içün tarafına tenbîh olundu. Meʾzûn-i insırâf olan Kîsedâr Yûsuf Efendi Babadağı'ndan bir merhale mufârakatında ser-pençe-i saht-gîr-i ecelde zebûn ve terk-i mâ-kân ve mâ-yekûn edüp, naʿşı Babadağı'na ircâʿ ile Sultân Bâyezîd Câmîʿi'nde medfûn oldu. Yesrî Ahmed Efendi'nin dahi ʿilleti yevmen fe-yevmen kabûl-i zemânet ve ʿâkıbet ʿazm-i sefer-i âhıret edüp, Yûsuf Efendi cenbinde ser-nihâde-i visâde-i râhat ve zebân-ı hâl ile, nazm: İcâretünâ innâ garîbân hâ-hünâ, Ve küllü garîbin lil-garîbi nesîbün inşâd ü kırâʾet eyledi. Müteveffâ Yûsuf Efendi Bazarcık Kasaba kurâsından Kütüklü nâm karyede tevellüd ve rütbe-i fark u temyîze tesâʿud eyledikde, Reʾîsülküttâb ʿAbdî Efendi'ye intisâb ve giderek Hazînedârlığı'yla kâm-yâb ve on beş sene kadar riyâset hizmetlerinde olan zevâta Kîsedâr ve Piyâde ve Sipâh Kitâbeti ve Haremeyn muhâsebeciliğin zabt ile kâm-kâr olumuşidi. Ber-minvâl-i muharrer seferde merhûm ve ʿâzim-i semt-i yevm-i maʿlûm oldu. Yesrî Efendi dahi müfredât-ı dünyâya sûret-i muhâsebe-i icmâl olan İstanbul'da yirmi târîhlerinde kımât ârâ-yı vücûd ve tahsîl-i meleke-i bûd u ne-bûd eyledikde, Tahvîl [M2 175] Kalemi'ne Mülâzemet ve devr-i Sultân Mustafa Hânî'de Küçük Tezkirecilik ile kesb-i mezîd-i rifʿat edüp, birkaç seneden sonra Büyük Tezkireci ve seksen iki târîhinde ʿAtıf-zâde ʿÖmer Vahîd Efendi yerine Çavuş-başı olup, sefere meʾmûr ve seksen üç târîhinde mansıb-ı mezkûrdan mehcûr ve Baş-muhasebe ile hâtır-ı meksûru mecbûr olup, o esnâda Âsitâne'de olan hânesinde mevcûd benîn ü benât ve sâyir yirmi kadar havâşîsi âfet-i maʿlûm ile maʿdûm olduğundan, müte'essir ü mağmûm ve bu takrîb hummây-ı rediyye ile mahmûm ve ʿâkıbet kendü dahi vefât ve terk-i meşgale-i kâyinât eyledi.