Mısr-ı Kāhire'de bir sene şiddet-i vebâ vâfir âdem ifnâ edüp, kırk kimse bir mahalle gelüp, bu âteş-i serkeşden rehâ ve ʿillet-i sirâyetden firâr ile rûhların ebdânda ibkā arzusuyla İskenderiyye'ye gelüp, fi'l-hâl bir sefîne istîcâr ve muvâfık-ı rüzgâr ile yirmi mîl yer katʿ etmişler iken, nâ-gâh safvet-i hevâ zâyil ve bir muhâlif rûzgâr hubûbuyla deryâ muztarib ü mütehalhıl olup, şiddet-i bâd sefînenin sütûnunu şikest ve yelkenini hark ve sâlifü'l-beyân kırk âdemi gark eylediği baʿzı tarîhlerde manzûr olup, bu menkabeye müşâbehet bulunduğundan li-ecli'l-iʿtibâr keşîde-i silk-i sütûr kılındı. Nazm: Edemez defʿ sakınmağla kazâyı kimse, Bin sakınsan yine en son olacak olsa gerek. Bu muhârebede otuz beş kadar merd-i pür-celâdet zâyik-i şerbet-i şehâdet ve Ordu Ağası ve iki yüzden mütecâviz dilâverler cerîh-i dest-i ehl-i gavâyet olduğu ahbârıyla Serʿasker Paşa mahzar siyâkında bir kıtʿa mufassal beşâret-nâme îsâl ve bu gazây-ı garrâda bulunan serdengeçdilerden dört nefer kimseyi maʿan irsâl edüp, varak-ı gül-i mutarrâdan eltaf ü erakk olan varak-pâre-i beşâret ʿalâ ru'ûsi'l-eşhâd feth u kırâ'et olunup, cümle ordu halkı nişvân-ı râh-ı meserret olmağla, bekūrî-yi aʿdâ mehterhâne ve top şenlikleriyle izhâr-ı şâdumânî vü sürür ve fi'l-hâl bu keyfiyyeti Serdâr-ı ekrem hazretleri ʿarz-ı ʿizz u huzûr eyledi. Beşâret-nâme ile gelen serdengeçdi ağaları hilʿat ve çelenk ile tatrîb ve yarımşar kîse akça ve âdemlerine kırkar guruş ihsân ve tatyîb olunduklarından fazla esâmelerine terakkī husûsu Yençeri Ağası'na fermân ve Serʿasker Paşa'ya serâ-sere kaplu bir sevb-i semmûr ve murassaʿ tîg ve üç bin altûn ihsân olunup, sâyir guzâta taksîm içün bin ʿaded sîm çelenk ile dört bin kıtʿa tüy çelenk dahi irsâl ve tahsîn ü sitâyişi şâmil ısdâr-ı misâl kılındı.