Şehr-i mezkûrun yirmi birinci cuma günü aʿdây-ı dîn ü devlet tertîb-i tabur ve bir sudan bir suya dek Özi Kalʿası'nı mahsûr edüp, kalʿada mevcûd cünûd-i zafer-mevʿûd bî-ihtiyâr kalʿadan hurûc ve düşmen taburuna vülûc edüp, hamle-i ûlâda süvârîlerini perâkende ve bîh-ı cemʿiyyetlerini bergende etdikden sonra taburlarına duhûl ü iktihâm ve beş sâʿat kadar iʿmâl-i seyf-i ʿaduvv iltikām etdikden sonra düşmeni kalʿaya takrîb ve ve sanʿat-ı âteş-bâzî ile taʿzîb kasdıyla hîle-i harbiyye izhâr ve sûret-i firâr bedîdâr etmişler idi. Bu hareket aʿdâyı mağrûr ve hücûm u taʿkībe mecbûr edüp, bî-fikr-i encâm top menziline vazʿ-ı akdâm ve kalʿa ve limanda âmâde kılınan top ve humbaraya ateş verilüp, katʿî çok müşrik mürde vü hâlik ve niçe bergeşte-hâl-i inhisâm-ı aʿzâ vü cevârih ile giriftâr-ı eşedd-i nekâl olup, ʿarsa-gâhda ikāmet müşkil ve durdukça ekserî müsteʾsıl olacağlarını müteʾemmil [M2 170] olarak, firâra âgāz ve bu varta-i hevl-nâkden tahlîs-i nefs ganîmetini intihâz eylediler. Aʿdâ kuvve-i istidrâciyye ile her tarafda galebe müşâhede ve kibr ü nahveti gûn be-gûn ziyâde olarak bilâ-fâsıla Memâlik-i mahrûseye pây-ı tecâvüzü itâle eyleyüp, Kılburun'a dahi vâfir laʿîn taʿyîn ve kalʿayı hasr u tazyîk ile muhâfızları endûh-nâk ü hazîn edüp, keyfiyyet-i mezkûre Özi muhâfızı Vezîr Hazînedâr ʿAlî Paşa'ya maʿlûm oldukda, iki yüz nefer dilâver ve on beş nefer topçu ile kalʿaya imdâd ve mahsûrlara kuvvet-i kalb ve müdâfaʿaya istiʿdâd vermişidi. Lîmânda olan sefâyin-i İslâmiyye'de ve sûr-i kalʿada mevcûd toplara ateş verülüp, tarfetü'l-ʿaynda aʿdâyı makhûr ve pîrâmen-i kalʿadan dûr edüp, nâdim ü sâdim geldikleri mahalle ʿazîm oldular. Özi muhârebesinden firâr eden eşrâr, cebr-i kesr ile tekrar kalʿayı muhâsaraya ictisâr edüp, kemâ-kân kalʿadan top ve humbara ile cemʿiyyetleri perîşân kılındığı ahbârı Ordu-yi hümâyûn'a meserret-resân olup, şükran li-hâze'n-niʿam bu haber-i dâfiʿu'l-elem Sadrıaʿzam tarafından aʿyân ve efrâda neşr ve cümlesini hisse-i evfây-ı sürûr ile muğtenim eyledi. Vezîr-i müşârun ileyhin ser-zede-i mevkiʿ-i zuhûr olan hıdmeti şâbâş ü tahsîne sezâ-vâr kılınup, üç bin altun ceyb harçlığı ile hâtırı istifsâr olunduğundan başka, Kılburun Muhâfızı ʿAbdullah Paşa dahi bu ʿâtıfet-i dil-nüvâzdan hisse-yâb ve bin altun irsâliyle mazhar-ı nevâziş-i Sadr-ı ʿâlî-cenâb oldu. Özi Kalʿasının gezend-i düşmenden vâreste olması aksây-ı meʾârib-i Şâhâne olduğuna binâʾen, idâre-i umûr-i serhad zımnında Rikâb-ı hümâyûn'ları tarafından üç yüz elli kîse Varna İskelesi'nden irsâl olunduğundan fazla her taraf mesdûd olmak hasebiyle, kalʿada vucûd-i lahm nâ-bûd ve leyl ü nehâr mukābele-i aʿdâda cân-sipâr olan murâbıtînin bu vechile dahi zarûrete dûçâr olmamaları matlûb-i Şehriyâr-ı İskender-vekār olmağla, emr ü irâde-i mülûkâne-leri üzere yirmi bin vukiyye lahm ordu kasap-başısı tarafından tertîb ve iskele-i mezbûreden îsâl ile mahsûrlar terfîh ü tatrîb olundu.