Müşârun ileyhin Mora'dan berü taraflara teveccühü ibtidây-ı emirde mühr-i hümâyûn ile müşerref olmak irâdesine mebnî iken, vakt ü zemânı hulûlune dek sâ'ik-ı takdîr bu emr-i hatîri bâz-beste-i girih-i te'hîr ve tehallüf-i matlab ile Sadâret, Silahdar Mehmed Paşa'da karar-gîr olmuşidi. Ancak [M2 166] müşârun ileyhin sît ü savleti münteşir-i âfâk ve elsine-i nâsda medh u senâsı mütecâviz-i hadd-i iğrâk olup, bu vakitlerde hâlün ʿani'l-ʿamel metrûk ve mühmel kalması münâsib görülmeyüp, Serdâr-ı ekrem İsakçı'dan mürûr etmek mukadder olduğu hâlde, müşârun ileyhin dahi Vidin taraflarından asâkir-i vâfire ile karşu geçmesi tasmîm ve seksen dört senesi evâhırında Rumeli mansıbı ve Serʿaskerlik ile kadr ü iʿtibârı tefhîm olunmuşidi. Müşârun ileyh dahi mukaddemâ neşr olunan evâmir-i celîle iktizâsıyla her tarafdan sevk-ı asker ve cemʿ-i leşker eyleyüp, muntasıf-ı sayfda Vidin havâlîsine rekz-i aʿlâm ve Vidin mukābilinde olan Kalafat nâm mahalle geçüp, darb-ı hıyâm eyledi. Mahall-i mezkûrda birkaç gün ikāmet ve Krayova'ya varup, ordusuna takviyyet verdikden sonra cumâdelûlânın sekizinci gününde Kulle'ye doğru tahrîk-i râyet eylediği, Sadrıaʿzam ve Serdâr-ı ekrem'e maʿlûm oldukda, berü tarafda olan vüzerâ ve mîr-i mîrân'a evâmir-i ʿaliyye irsâl ve müşârun ileyhden haber vardığı gibi karşu geçüp, maʿiyyet-i müşîrîlerinde ictimâʿ u ihtifâl ve emr ü nehyi üzere harekete ibtidâr eylemeleri tenbîhinde istiʿcâl olundu.