Tulça'da vâkiʿ olan mesâ'ib muhâfız bulunan Ahmed Paşa'nın ʿadem-i idâresinden neş'et eylediği zannıyla ʿazli vâcib görülüp, Moravî Ahmed Ağa bir muhâfız tedârüküne dek o havâlîye me'mûr ve yedine iʿtây-ı menşûr kılındı. Sadrıaʿzam birâderi Hüseyin Bey ile taraf-ı vâzıhu'ş-şeref-i hazret-i Cihândârî'den teşrîfât-ı seniyyeye mashûb bir kıtʿa hatt-ı bedîʿu'l-üslûb şeref-rîz-i vürûd olup, mazmûn-ı hatt-ı münîf aʿdânın her tarafdan hücûmu sebebi ile tabʿ-ı hümâyûna gubâr-ı melâl ʿârız olduğundan ve bundan böyle yek-dil ü yek-cihet defʿ-i keyd-i aʿdâya mübâderet kılınmasından ibâret olup, bu me'âl-i hatîr cümleye ifâde vü tezkîr olunup, ahz ü sâr ve recây-ı nasr-ı cenâb-ı Kahhâr ile dest-ber-âverde-i dergâh-ı ilâh oldular. Ordu-yi hümâyûn'un Babadağı Sahrâsı'ndan hareket ve aʿdâ üzerine [M2 165] ve yâhûd âhar tarafa teveccüh ü ʿazîmeti fıkdân-ı esbâb ile dâhil-i hîta-i tasavvur olmadığı cümleye maʿlûm olup, altmış gün kadar vakt-ı ikāmet mümtedd ve tûl-i meksden kulûb-ı nâsda fütûr u se'âmet giderek müşted olup, teferruk-ı hâletlerinden ihtirâz ile ʿale'l-ʿumûm ocağlara ve sâyirlere fermân-ı ʿâlî ısdâr ve Yeniçeri Ağası Süleyman Ağa sevkıyle Kır Serdârı nasb olunup, iki yüz nefer ile dâyimâ geşt ü güzâr ve firâr edenleri mektûfu'l-eyâdî orduya ihzâr eylemesi tenbîh ü işʿâr olunmuşidi. Bu tedbîrin bir zemân fâyidesi zâhir u ʿıyân olup, firârdan herkes tersân ve ahz ve ircâʿ-ı iftizâhından lerzân olmuşlar iken, bu esnâda Babadağı kurbunda olan limanlardan ordu halkının baʿzısı İstanbul kayıklarına bilâ-mâniʿ râkib ü zâhib oldukları şâyiʿ olmağla, bu kapuyu dahi sed ve o mülâhazada olanları menʿ u sadd içün esnafdan maʿadâ şahs-ı vâhide Kethudâ Bey tezkiresi yedinde olmadıkça, ruhsat-ı ʿazîmet verilmemek üzere gedüklülerden Miftâhî İbrâhîm Ağa ve bir Turnacı o havâlîye taʿyîn olunmuşidi. [Mısrâ]ʿ: Ahabbü şey'in ile'l-insâni mâ-müniʿâ mefhûmu kulûb-i nâsda hüveydâ ve maʿberlerde bulunan gümâştegân-ı devleti akça ile itmâʿ edüp, bahran Âsitâne tarafına şirâʿ-güşâ oldukları ahbârı Ordu-yi hümâyûn'a münʿakis olmağla, bilâ-tecribe me'mûrları te'dîb tasvîb olunmayup, binâ'en ʿalâ zâlik fiʿlen dahi mâdde tashîh ve der-ʿakab Turnacı-başı nefy tarîkıyla tesrîh olunduğundan başka, zaʿîm-i mezbûrun dahi zeʿâmeti refʿ ve gediği âhara defʿ olunup, islâh-ı nefs sûretinde Platimana (پلاطمنه) Kalʿası'nda habs olundu. İklîm-i Mısır'da tugyân ve o iklîm-i ʿazîmde daʿvây-ı istibdâd ü infirâd ile ʿisyân eden ʿAli Bey'in haber-i helâki Rikâb-ı hümâyûn tarafından tahrîr olunup, gā'ile-i sefer hilâlinde merkūmun serkeşliği sebeb-i teşettüt-i bâl ve bâʿis-i tekessür-i endîşe vü hayâl olmağla, vefâtı haberi tenşît-ı havâtır ve tefrîh-i kulûb-i ekâbir eyledi.