Şehr-i rebî'ulevvelin yedinci günü ahvâl-i sefer müzâkeresiyçün Mu'asker-i hümâyûn'da bulunan erbâb-ı 'ukūl ü ârâ 'akd-i meclis-i şûrâ edüp, Sadria'zam Ordu-yi hümâyûn'a geldikde, Kartal ve sâyir sevâhilde vâki' olan nevâyibât sebebi ile mevkib-i İslâm'ı mühimmât ve ashâb-ı harb ü darbdan hâlî bulup, bâdî-yi emrde mütelâşî ve bir bâdire zuhûrundan mütehâşî olup, ne hâl ise derdest bulunanlar ile hifz-ı sevâhil umûruna mübâşeret etdiyse dahi, ta'yîn olunan asâkir me'mûr oldukları mahallerde müstakar olmayup, bu sebeble düşmen kesb-i mâye-i cür’et ve birkaç def'a Tulça'ya çıkup, vâfir hasâret eylediğinden başka, kırk elli gün zarfında hezâr mihnet ile cem' olunan asâkir ve zehâyir ile İsakçı'ya istihkâm verildi i'tikādında iken, hasm-ı güm-kerde-i tarîk o tarafa dahi çıkup, bilâ-muhârebe askeri tefrîk ve eczây-ı cisri ihrâk ve etrâfdan imdâd varıncaya dek karşuda olan cem'iyyetlerine iltihâk eyledikleri, Sadr-ı müşârun ileyhi mahzûn ve âvâre-i sabr u sükûn edüp, bu esnâda asker ile pür-bâr ince donanma Tulça taraflarında be-dîdâr ve mevkib-i hümâyûnda dahi kesret hâsıl olmağla, karşu tarafa mürûr ve ahz ü sâr ü intikāma bezl-i makdûr fikri hâtır-ı Serdâr-ı ekremî'de cevelân eylediği, sibâk u siyâk-ı kelâmdan müstebân olup, bu niyyet her ne kadar mahz-ı isâbet ise dahi, fıkdân-ı esbâb ile kuvvetden fi'le çıkmayacağı meczûm olduğundan, huzzâr-ı meclis dem-beste vü hâmûş ve hücûm vâlihü [M2 161] hayret ile medhûş oldular. Sevâhilde vâki' olan fevz ü nusratı yâd ve kendülerinin altı yedi mâhdan berü ahvâl-i etrâf ile iştigālini ve ordu halkıyla 'ale'l-infirâd bir maslahat göremeyüp, fî-mâ ba'd ne makūle vaz' u hareket iktizâ eyleyeceğini ma'raz-ı su'âlde îrâd eyledikde: “Ordu-yi hümâyûn ta'yînâtı iki günde bir verilüp, bu tasarrufdan hâsıl olan zehâyir sevâhilde temekkün eden asâkirin akvât-ı yevmiyyelerine tertîb ü tanzîm ve ceste ceste vürûd eden asker dahi buna kıyâsen serhadlere taksîm olunup, karşuya murûrun 'illet-i gā'iyyesi olan cisr dahi bi-eczâ'ihâ muhterik olmağla, zâhir-i hâle nazaran Tuna'nın öte cânibine sevk-i askerin sebîl-i imkânı maktû' ve neyl-i matlab bu tarîk ile memnû' görülür. Tuna donanmasını İsmâ'îl'e me'mûr ve bâ-fazl-ı Hak istihlâsı meysûr olursa karşu tarafda bir mahal derdest bulunup, ba'de zâlik maslahat neyi îcâb ederse ana göre hareket olunur” dediklerinden sonra, düşmen Krayova ve sâyir mahalleri terk ü firâr edüp, niçün tevakkuf olunur ma'nâsını şâmil serhadlerden gelen ahbâr ve maglataya havâle-i sem'-i i'tibâr câyiz olmayup, zîrâ vücûd-i mühimmât ve zehâyir ile serhadlerden karşu geçüp, hasım ile mukābeleye vâfî asker olmadığından fazla, Muhsin-zâde'nin asâkir-i vâfire ile o havâlîye tekarrubü düşmenin müteferrik bulunan askerinin bir iki mahalle tehaşşüd ve sevâhilden dûr olmalarını îcâb ve öte yakaya asker-i İslâm'ın mürûr ihtimâli olursa kıllet-i zahîre sebebi ile askere iztirâb verüp, tecrübe-i düşmen üzere kıllet-i zahîreyi asker behâne edüp, giderek hod be-hod tefrika ve inkılâb hâletleri zuhûr etmek maʿnâlarına mahmûl olduğunu, meclisde bulunanların baʿzısı işrâb eyledi. Ve'l-hâsıl niçe kīl ü kāl ve i'mâl-i fikr ve beyân-ı ihtimâl ʿakîbinde Tulça pîşgâhında olan donanma askeri İsmâʿîl tarafına geçüp, kasabada mevcûd küffârı tedmîr ve mahall-i mezkûru teshîr etmek üzere meclis karar-gîr ve donanma askerinin Baş-buğlarına bu kazıyye şifâhen emr ü tezkîr olundu.