Krayova'yı yağmâ eden aʿdâ Kulle'yi istîlâ kasdıyla Yergögü'de olan cumûʿ-ı dalâlet-metbûʿlarından istimdâd ve bin beş yüz kadar kâfir imdâdıyla bi'l-ittihâd Kulle üzerine gelüp, ʿale'l-gafle hecme-endâz-ı şerr ü fesâd olmuşlar idi. Niğbolu muhâfazasında olan Vezîr el-Hâc Ahmed Paşa'ya bu kazıyye ihbâr ve mümkin mertebe iʿânete ibtidâr ile saferu'l-hayrın yirminci günü cenge mübâşeret ve dört gün kadar iki taraf ifrâğ-ı cehd ü tâkat ve iki üç defʿa zümre-i muvahhidîn düşmen-i dînin meteris ve tabyâların zabt ile izhâr-ı metânet edüp, vâfir kâfire izâka-i zehrâbe-i merg ü fenâ ve niçelerini zahm-ı mühlik ile [M2 160] âh ü enîne mübtelâ eyleyüp, küffâr bu hâle nazar ile bi'l-külliyye müdemmir olacağların mukarrer bilüp, hemân hıyâm ü hargâhlârını intikāz ve sûret-i firârda Bükreş tarafına intihâz eylediler. Bu muhârebede elli kadar merd-i dilîr niʿmet-i şehd-i şehâdetden dil-sîr ve seksen kadar mübâriz-i nâmdâr zahm-dâr olup, Yergöğü'den bi'l-istîmân hurûc eden kefere dahi Kulle'de olan kefereye iltihâk üzere oldukları haberi istirâk olunduğuna binâ'en, Ruscuk Ser'askeri Vezîr 'İzzet Ahmed Paşa verâlarından asker ta'yîn ve Kulle'den hemcinslerinin darb-ı sahîn ile mazhar-ı hışm ü kîn oldukları haberinden gam-gîn ve bundan kat'-ı nazar İslâm askerinin iki fırkası miyânında kalup, tahlîs-i cân edinceye dek haylî meşakkat çekdikleri vâsıl-ı derece-i yakīn oldu.