Yeniçeri Ağası Süleyman Ağa'nın ʿakl ü dirâyeti tahkīk-kerde-i hazret-i Şehriyârî olup, şevkini tecdîd ve kadrini mezîd etmek kasdıyla taraf-ı hümâyûndan bir mücevher hançer Serdâr-ı ekrem hazretleri tarafına gönderilüp, yeden bi-yedin mûmâ ileyhe iʿtâ ve kadr ü iʿtibârı dü-bâlâ kılındı. Mîr-i mîrân-ı kirâmdan olup, Tulça muhâfazasına me'mûr olan es-Seyyid Ahmed Paşa mahall-i mezkûrda bir maslahata muvaffak olmadığı muhakkak ise dahi, o havâlî ile ülfet ve bi-hasebi'l-istitâʿa ibrâz-ı gayret edüp, maʿiyyetine dahi vâfir asker taʿyîn ve nüfûzuna sebeb olmak içün kāmet-i liyâkati câme-i zerrîn-tırâz-ı Vezâret ile tezyîn olunmasını erkân-ı muʿasker-i hümâyûn tahsîn etmeleriyle, gurre-i rebîʿulevvelde matlabıyla be-kâm ve dâhil-i silsiletü'z-zeheb-i vüzerây-ı ʿizâm oldu.