Serʿasker-i müşârun ileyh matlaʿ-ı Vezâreti'nde müsâʿade-i kader ile kârger olan hidmet-i bâhiru'l-eserini istihsâl-i Sadâret'e mukaddime ve yâhûd peyâm-ı feth evvelce semʿ-i hümâyûna resîde olmak mülâhazalarıyla, ordudan evvel bu haber-i hayrı Rikâb-ı hümâyûna tahrîr etdiği, maʿlûm-i Sadr-ı müşterî-tedbîr olup, bu vazʿ-ı nâdir tavr-ı kadîm-i devlete mugâyir olduğundan, müşârun ileyh münfaʿil ve miyânelerinde nâr-ı münâfese müştaʿil olup, ahadühümâ âharı gamz ve şiken-i hâtırı müstelzim tahrîrât ile tarafeyn iltizâm-ı semt-i kinâye vü remz eylediler. Makām-ı Sadâret'de olanların müterettib-i ʿuhde-i kifâyetleri olan umûrda muhâletat ve şirket-i ağyâr her ne kadar mûcib-i intifây-ı nüfûz ü iʿtibâr ise dahi, mecârî-yi ahkâm-ı kadere rabt-ı rişte-i iʿtikād eden Sudûr-ı ʿizâm kâse kâse tecerruʿ-i zehr-âbe-i sitem ü âlâm ile zât-ı maslahatı iltizâm ve umûr-ı devlet ber-vefk-i irâdet ne vechile pezîrây-ı hüsn-i temşiyet olursa, hemân olsun tavrıyla, [M2 159] hod-re'ylik vâdîsinden iʿrâz ve mü'essir-i hakīkī tarafından bila-irâde eseri mümteniʿ olan evzâʿ muhâlifînden iğmâz-ı hazerde ʿumûmen ve seferde husûsen lâzım geldiği vâreste-i kayd-ı iʿtirâzdır. Sadrıaʿzam şâyibe-i hased ile mevsûf ve zaʿf-ı kalb ve feyâlet hiss ile maʿrûf olduğundan, himâyet-i makām ve istirzây-ı nefs-i bed-râm iktizâsıyla, Serʿasker-i müşârun ileyhi istirkāb ve muhassenâtını maʿraz-ı isâ'etde ʿâlem-i bâlâya tahrîr ile kesr-i sevretine inkibâb bir emr-i nâ-savâb olduğu zâhir idi. Lâkin enefe vü nahvet-i Vezâret, fazlan ʿani'l-beşeriyye mütehâmmil-i bârgirân-ı müşâreket olmayup, o makūleleri Sadr-ı rahîb ve muʿâmele-i dil-firîb ile hâllerine terk ve ʿavâkib-i umûra nazar edenler ekall-i kalîldir.