İltikāy-ı aʿdây-ı li’âmda ihlâs-ı tâm ve sebât ü ikdâm ve hevl-i cenge müsâberet ve iʿlâ-i kelimetullâha kasd u niyyet ekser-i ahyânda fevz ü nusrata sebeb ve tedmîr-i ehl-i şirk ü tuğyâna ʿillet olduğu mümtehan ü mücerrebdir. Lâ-cerem bu defʿa Yergöğü tarafında kıbel-i cenâb-ı Vâcibü'l-vücûd'dan cünûd-i muvahhidîne mevʿûd olan metn-i fevz ü fütûh bu vechile meşrûh kılınur ki, Ruscuk Serʿaskeri Vezîr ʿİzzet Ahmed Paşa yed-i aʿdâya giriftâr olan Yergöğü'nün esbâb-ı istihlâsını te'emmül ve maʿiyyetinde olan serân-ı asker ve sâyir erbâ-ı vukūf ile bu maslahatın semt-i sühûletini tefekkür ü tehayyül eyler idi. Kudûm-i behâr ile basît-i gabrâ lâlezâr ve mukābele-i aʿdâ zemân-ı nümûdâr olup, ʿillet-i kerr u ferr olan huyûl-i erbâb-ı gazâ içün çerâgâh ü merâtiʿ, Ruscuk taraflarında derece-i ihâtadan dûr u şâsiʿ olup, Yergöğü ile Ruscuk miyânında vâkiʿ adada giyâhın kesreti olduğundan, katʿ-ı ʿalef ve mümkin olursa düşmeni tîr-i merg-i helâke hedef etmek niyyeti ile bir mikdâr âdem zikr olunan adaya taʿyîn ve düşmene bu hâl müstebîn oldukda, bir gürûh asker ifrâz ve tüfeng ile cenge âgāz eyledikleri Serʿasker Paşa'ya maʿlûm oldukda, bî-mehâbâ münferiden o tarafa mürûr ve Ordu Ağası Yeğen Ağa'ya bu hâl manzûr oldukda, ol dahi berzede-dâmân-ı ʿubûr ve istîsâl-i düşmene bezl-i makdûr eylediler. Ruscuk tarafında bulunan pür-dilân-ı İslâm'ın dahi tenevvür-i şevk u hamiyyetleri feverân ve kadr-i celâdet ü gayretleri galeyân edüp, zevraklarla adaya geçüp, cemʿiyyetleri ʿaded-i ehl-i Bedr'e mütekārib oldukda, adadan güzâr ve Yergöğü'ye bir buçuk sâʿat mahal olan İslabozi [Slabozia] nâmıyla şöhret-medâr olan çiftliği zabt içün Serʿasker Paşa Ordu Ağası'nı taʿyîn ve ol dahi çiftliğe varup, derûnunda bulunan aʿdây-ı [M2 157] dîn ile muhârebeye dâmen-çîn-i kahr u kîn oldu. Müşârun ileyh ile adada ceng ü harbe mübâşeret eden aʿdâ dahi havl ü kuvvet-i cenâb-ı Hudâ ile münhezim olup, köprülerini fekk ile kalʿa kurbunda olan meterislere firâr ve istinâdları olan toplar ile asker-i İslâm'ı ʿadem-i takrîbe bezl-i iktidâr ve cünûd-i İslâmiyye'de tüfengden gayri âlet-i harb olmadığından, Serʿasker-i müşârun ileyhe askeri mahall-i tehlike vü muhâtaradan ʿavk ve tehyîc-i devâʿî-i şevk ile çiftlik tarafına sevk eyleyüp, kendüsü dahi bir piyâdeye rükûb ve tâlib-i nahçîr olan şîr gibi çiftlik tarafına vüsûb edüp, iki asker birbirine ittisâl ve meteris hafrına iştigāl ve iki sâʿatden sonra teterrüse kābil bir mahall-i menîʿ istihsâl eylediler. Ferdâsı sehere karîb ehl-i nâkūs u salîb taburlarını tertîb ve cünûd-i muvahhidînin meterislerine mânende-i gürâz hücûma âgāz edüp, berü tarafdan merdâne mukābele ve âlât-ı ceng müdâvele olunarak meteris- lerde izhâr-ı sebât ü istikrâr ve o gürûh-i mekrûhu nişâne-i dâne-i tüfeng eyleyerek, fi'l-hâl perîşân ü târumâr eyleyüp, bu sebeble düşmen kalʿaya rucûʿ ve der u dervâzesin sedd ve top cengine şurûʿ eylediler. Ruscuk tarafında ictimâʿ eden cünd-i mutâʿ bu keyfiyyete bi'l-müşâhede tahsîl-i ıttılâʿ eyledikde, şevk-i cihâd u gazâ derûn-i gayret-ihtivâlarında rû-nümâ olup, iki bin kadar dilâver, dâhil-i zîr-i Livây-ı Serʿasker-i zafer-rehber olup, açıkdan aʿdânın meterisleri üzerine hecme-endâz ve vaʿd-i nasr-ı mübîni istincâz ile beş sâʿat kadar şuʿle-i cevvâle-i ceng ü cidâl harmen-sûz-i sâmân-ı aʿdây-ı bed-âmâl olarak bir mikdârı küşte-i samsâm-ı kahr ü istîsâl ve baʿzısı zahmdâr-ı şeşper-i hizy ü nekâl olup, bakıyyetü's-süyûf süvârî ve piyâdesi mahlût olarak meterislerden hurûc ve esve'-i hâl ile kalʿaya vülûc eylediler. Düşmen terk etdiği hısânât asker-i İslâm'a me'men ve karşudan celb olunan dört kıtʿa top ile kalʿayı döğüp, bir müddetden berü istidrâcdan hâsıl olan sürûrları mübeddel-i mâtem ü şîven oldu. Yergöğü semtinde hudûs eden vekāyiʿ her tarafda müstefîz u şâyiʿ olduğundan, Mesʿûd Girây Sultân Ziştovi maʿberinden vâfir asker ile geçüp, rûz-i mesâffın üçüncü günü neberd-gâha vâsıl ve kulûb-i muvahhidînde [M2 158] mâye-i kuvvet hâsıl olup, kalʿaya yürüyüş tedbîri dermeyân ve berren bu garaza vusûl ʿasîru'l-imkân ve nehren hücûm her hâlde sehl ü âsân olduğundan, dalkılıç tahrîriyle emr-i mezkûrun îkāʿına karar vermişler iken, meteris hizâsında vâkiʿ cisrin zencîri ehl-i İslâm tarafından atılan top darbından şikest olup, hemân birden kalʿanın hendeklerine sevk-i ketâyib ve içinde bulunan melâʿînin ekserini müste'sıl-i suyûf-i kavâzıb eyleyüp, bakıyyesi istîmân ve kalʿayı bir iki gün mehl ile teslîm edeceklerini tefhîm ü beyân etdiklerinde, ʿale's-seher kalʿayı tahliye ve âminen mecmaʿları olan mahalle giderlerse emân verileceği haberiyle bir âdem gönderilüp, zarûrî bu sûrete rızâ ve kalʿadan çıkup, orduları tarafına ʿinân-ı haybet ü husrânı irhâ eylediler. Yergöğü'nün istihlâsı haberi miftâh-ı kalʿa ile müşârun ileyh tarafından Ordu-yi hümâyûn'a vârid olup, bir müddetden berü nevîd-i feth u nusrat gûş-zed-i erbâb-ı tevhîd olmadığından, kâffe-i nâs kesb-i sürûr-i bî-kıyâs edüp, dâyimâ mansûriyyet-i İslâm ve makhûriyyet-i düşmen-i bed-fercâm edʿiyesini felek-i Atlas'a mümâs eylediler. ʿAvn-i hazret-i Bârî ve yümn-i baht-ı cenâb-ı Tâcdârî'yle vukūʿ bulan feth u zafer tefâsîl-i ahvâl-i muhârebe ile maʿrûz-ı ʿatebe-i Şehriyâr-ı heft-kişver kılınup, mir'ât-ı tabʿ-ı hümâyûn meclây-ı suver-i sürûr-i gûnâ-gûn oldu.